5月初既時候，我同伴旅2人咩住大背囊遊走秘魯、進化島同亞馬遜森林。事前，我地做足功課，收集左好多資料，但因為好少人會分享一d比較詳細既資訊，所以去到發現有好多甩漏。而希望寫呢個Blog可以幫到將會去既旅行者！ 第三站：亞馬遜森林 Hi Lucy! (佢係酒店既長駐顧客) 南美之旅既最後一站—亞馬遜森林。細細個既時候，對亞馬遜森林既印象就係覺得好多蚊、好多蛇蟲鼠蟻、好落後、週圍都會係巨蟒、大蜘蛛、d昆蟲都比出面世界大幾倍、週圍既生物植物都係有毒……原來係我幻想多左。 今次我地同樣都係Join當地團，一共5日，一團4人 (如果好彩可以有私人團)。*聽聞我地所Book既團係咁多個之中第2貴*，大約HKD $7-8ooo，普遍d人係由秘魯入亞馬遜森林 (約HKD $3-4000)，而我地因為去完進化島，所以就順住條路，由厄瓜多爾到入。 1st DAY：一落機後，導遊就已經過黎迎接我地，之後帶我地去搭船進入亞馬遜森林。今次個程船雖然無進化島個d咁大浪，但時間上都係要成2-3個鐘先到到，開頭覺得d風吹埋黎幾舒服，但吹下吹下就好頭痛。 前段係快船，後段就要辛苦導遊用手划船。 波平如鏡既世界 初初我都好擔心住宿環境，但意想不到既乾淨！最令人驚喜係個洗手間，真係可以媲美出面城市d酒店，員工都好勤力清潔。事後聽翻其他團友對廁所有d微言，原來我地個間10號房係重新翻新過，難怪當時見到隔離9號同8號都裝修緊， 睇黎我地都幾好彩。 登登@v@ 目前唯一裝修過既10號房！ 食物方面佢地都好有心思，每日午餐同晚餐都唔同，多數以牛肉為主。不過早餐就只有太陽蛋、炒蛋同烚蛋選擇，食蛋都食到想嘔…… 每一餐既毛巾擺設都係唔同~呢個最有創意 2nd DAY：我地第2日就去左一座高塔到觀鳥，原來另外個2位團友係雀鳥愛好者，之前已經去過唔同地方既亞馬遜森林睇雀，話希望今次旅程可以睇到200種種類既雀。基於呢個理由，導遊成朝都好落力幫佢地搵雀。 因為我個伴旅有畏高，佢一到捉實個扶手落樓梯，我就一到恥笑佢~ 到夜晚，我地入左附近既森林夜行。雖然見到既種類唔係好多，但都係一個幾有趣既體驗。 3rd DAY：唔知係咪因為我地既運氣已經用左係廁所上面，由第3日開始就落雨。太大雨既關係，我地原先既活動要取消，被更改為睇雀，應該係又睇雀…正當我翻左房去辦大事既時候，我個伴旅whatsapp我話見到水瀨 -_- 到到下就，雨勢都無咁大，導遊就話去多一次高搭到，今次唔係睇雀，主要係搵樹懶 (因為前一晚我地話想睇)，開頭佢地話好難會見到，因為樹懶活動得好慢，好難察覺到。但開始無幾耐就話搵到！(d運又開始番黎！？) 雖然見唔到佢既正面，但望住佢郁郁下都好搞笑。 千年難得一遇既樹懶~~ 同場加映：馬騮 *********************************************************************************************** 話說，我第一日去到酒店第一時間就拎前幾日d憐污糟底衫褲去洗，諗住有太陽晾1、2日會乾啦，第1日，未乾 (好正常丫)。第2日，未乾 (都7788啦)。第3日，仲未乾 。第4日，都仲未乾……亞馬遜森林既濕氣由洗底衫褲見證得到。 *********************************************************************************************** 4th DAY：第4日活動特別d，去參觀導遊所屬既部落，而咁岩呢日係佢地既母親節，所以部落聚集左好多人係到慶祝。一到埗後，當地婦女向我地介紹傳統食物，講到森林部落，又點少得食又大又肥美既蟲，導遊仲好熱心係我地面前表現生食，雖然佢口講好味，但佢個樣擺到明唔係好享受。佢地知我地城市人一定唔習慣生食蟲，佢地好細心事先BBQ左d蟲，但賣相都真係唔太討好，加上自己好難衝破心理關口，我最後無嘗試到，不過我伴旅就話個味道幾似煙肉，佢覺得又幾好味。 5th DAY：最後一日既活動係搭船出翻去機場，船程時間同路程都一樣，唯一唔同既係今次吹黎唔止係風，仲有無情的雨水，再連埋船既速度，每滴雨水就好似水槍射落你d毛孔到，加上佢地提供既雨褸係唔防水，今次想唔濕都難。 一連3星期既旅程咁就完滿結束，最多謝我既伴旅嫌我蠢，唔洗我Plan行程。一個願意Plan行程既男人好難得，而一個因為你蠢唔比你Plan行程既男人仲難得，多謝你。麻煩你快d Plan下一個旅行啦~呵呵呵 溫馨提示：建議帶d即棄/Dum得既Underwear；睇動物記得帶望遠鏡；夜行要準備定頭燈/電筒；建議自攜一件超防水又耐用既雨褸；出發前記得去衞生署旅遊健康服務睇醫生同打針；香港護照去厄瓜多爾無需簽證 *聽聞資訊由伴旅口中所提供* 完！
