望穿秋水, 終於等到一個全男性化的商場Show, 當知道萬能俠都有展覽, 第一個反應:「(O嘴...嘩!發達啦!)」 7 米高的巨型鐵甲萬能俠, 我見到已經情不自禁發癲啦...沒辦法, 由細到大, 也飲住超合金奶水長大的我, 今日見到老朋友, 興奮到爆呀. 就在拍影期間, 真人萬能俠又步出大街, 原來他也要和「自己」合照影官方相喎. (一大一細, 好Q呀!!) (情人眼裡出西施...現場有年輕人說:「真人扮到咁甩漏, 心口嗰高熱板又歪, 頸又曲...」, 我話:「萬能俠放個屁都係香嘅, 小朋友你太年輕喇...」) 今次展覽, 一次過可以有齊萬能俠1, 2號, 巨靈神, 三一萬能俠, 愛美神, 還有大鐵牛. (嘩!勁個Kinder出奇蛋, 一次過滿足我6個願望添呀) 巨型鐵甲萬能俠頭...我其實最想找條梯...我好好好想坐入「朋友號」入面...王友良先生, 如果花多少少心思, 可以給人排隊坐上「架駛艙」拍拍照, 效果一定會更正!! Michael Jackson是樂壇的神, 萬能俠就是玩具界的MJ, 我愛你愛到死, 因為我6歲第二盒買的超合金便是衪; 1997年同一款萬能俠超合金魂, 我足足儲了初版, 再版, 日版, 港版, 金版, 黑版, 復刻版... 去年萬能俠推出1000%Be@rbrick, 我一樣不放過. 所以, 今日帶阿囝去睇展覽, 他一見到萬能俠就說:「哦!E隻嘢呀!!」(咩E隻嘢呀?? 褻瀆聖靈呀你...萬能俠係爸爸當神咁拜㗎) 今次展覽最有感覺就是重溫懷舊萬能俠雜誌, 如果可以揭頁閱讀, 我想我一定會日日過來「打躉」. 我叫阿囝揀一位朋友合照, 他選擇了大鐵牛...期間有小情侶對話, 女方:「個公仔好得意喎」, 男友:「又會有個小露寶係度嘅, 妳同唔同小露寶影相呀?」(心諗...小露寶係紅色㗎) 當然, 真人萬能俠又在我影相期間再度出現...集郵是我的名字, 我又第一時間纏實佢... 不過, 今日愛美神不在, 如果你也想和真人萬能俠, 真人愛美神合照的話, 7月, 8月有4次機會㗎. (暫時我就拖住個愛美神Figure止止喝先啦) 「鐵甲萬能俠」及「愛美神」握手會 日期:7 月 18 日、7 月 25 日、8 月 1 日及 8 月 8 日(星期六) 時間:下午 3 時至 7 時 地點:The ONE 大仁生活facebook http://dayanlife.blogspot.hk/2015/07/4-one.html
