由細被訓練到每晚飲一碗阿媽老火湯, 搬出來住之後, 就訓練自己四圍搵無味精的老火湯, 當然這艱鉅任務難到爆炸. 「希望在明天」, 前晚找到一間燉湯級數, 好味到連一向氹極唔飲湯的SY, 也自動自覺大口大口飲不停. (留返少少送麵呀老友...) 這裡有6款野菌燉湯, 姨姨說:「一周年紀念限定版羊肚菌, 好難搵, 又貴, (幾貴呀??), 黑松露之上, 白松露之下」(我要..我要呀!) 我經常來大角咀, 為何過去一年也不發現這間非凡靚湯小店呢?? (真係相逢恨晚...) 原來野生菇菌的藥效高於人工培植的舞茸,及姬茸多多聲, 而且價錢又貴, 這裡湯水的用料勁足, 老闆說:「因為肉嘅份量, 同野生菇菌係1:1」 (唔掛之得香成貢啦!) 燉湯價錢由$28-$49, 之後點米線也是加$4, 雞翼$8, 勁腍牛筋腩$15, 蘿蔔$5(唯一需要再炆腍少少...). (係唔係救命價錢呢?? 簡直良心小店呀!) 家住大角咀的Terry指, 之前想在區內食清淡少少都難, 於是就考慮自己開.「街坊生意, 我都唔敢收得貴, 40蚊食一個飯其實都幾貴啦」(香港多D你咁嘅老闆就發達). 每日只燉60碗靚湯, 今晚未到8點15分, 已經只賣剩兩款. (好彩今晚我哋早咗過嚟咋...Lucky仔!!) 原來店內其中一位姨姨就是Terry媽媽, (咁一定係怕母經常煲靚湯你飲, 所以你就諗到開燉湯舖啦!) Terry答:「唔係呀!係我上年讀Master比較得閒, 自己研究咩湯水又健康, 又可以配到飯, 配到米絲嘅呢...(讀Master都會得閒?)...哈!係呀!因為同一科我之前讀過麻」(你好勁呀!) 阿太今日點茶樹菇燉湯, 百年難得一遇, 她竟然添多一碗米線, 她說:「唔好嘥咗D湯麻」(平時食得晒一碗都偷笑...如果我哋晚晚嚟, 應該好快變欣宜) 老闆Terry說:「我自己鍾意「瑪卡」夠香, 「松茸」夠清甜. (哦! 咁我下次識得揀啦!) Terry的燉湯, 好味到我想搬來大角咀櫸樹街住樓上, 今晚一邊寫, 仍然掛住羊肚菌的好味道, 信我...飲完簡直興奮過上星期去太古跳波波池呀!! 湯品小棧 地址 : 大角咀櫸樹街20號富多來新村一期地下59A號鋪 電話 : 35650115 星期日及公眾假期休息 大仁生活facebook http://dayanlife.blogspot.hk/2015/06/blog-post_19.html