今日下晏睇完醫生, 由油麻地行去尖沙咀, 一直係度諗食D乜野做下午茶好, 本來行過幾間幾舊式魚粉食肆, 不過, 今日好鬼熱, 我又唔想坐得咁迫, 所以, 行下行下行到去老婆話係小儀開嘅個間"麵麵店", 一間裝修到真係非一般車仔麵舖, 絶對比平時嘅車仔麵舖開陽, 好骨子, 好舒服, 所以, 就走入去試返一碗. 入到去, 本來只係想叫一, 兩個餸, 但係原來話下午茶係三餸+一杯 紫貝天葵或豆漿 = $28蚊. 咁就好細心睇下會唔會裝修得咁特別, 會唔會有一D出面食唔到嘅特別野食呢 ? 結果係無嘅. 咁一見到有"豬爽肉", 我就以為係豬頸肉, 細果, 原來話係豬頸上D多D肥膏嘅肉. 肥肉太多....唔係咁啱我食. 清湯底對我嚟講淡淡地, 味唔太濃烈。幾好.食完條脷唔會太辛苦. 最鍾意係可以任食菜脯粒, 真係幾鬼好食, 我唔食得太辣都食得到, 夠晒醒神. 依家寫BLOG先發現原來六蚊餸有酸齋揀, 早知揀佢啦, 因為我揀左牛腩, 太縮水.都幾鬼韌. 本來我想試飲紫貝天葵, 不過賣晒, 所以變左山楂茶, 天時暑熱, 有杯涷野飲都OK啦. 其實, 唔多明點解ORDER紙嘅價錢全部用中國數字寫成, 連話店舖開業於1998年都係用中國數字寫. 有D奇怪, 同間舖嘅裝修咁"新"完全唔夾. 不過, 話時話, 乜間舖唔係好似只係新開張左幾個月咩 ? 點解會寫始創於1998年呢 ? 麵麵店 - 佐敦廟街274號
