因為, 今日要去灣仔探大伯, 所以探完之後就一家三口行下灣仔... 想當年合和中心60樓仲係一間旋轉酒樓, 飲茶食飯都有成個香港正景陪住你, 如果, 你又想睇景又想連飯錢都省返嘅話, 由17樓坐觀光LIFT直上56樓, 一樣都可以免費睇晒成個灣仔, 銅鑼灣... 記得我地對上一次搭觀光LIFT係兩年前, 果陣, 60樓間酒樓都己經執左喇.~好可惜!! 今日再去, 連原本17樓坐LIFT個位都重新裝修到好似D豪宅示範單位咁大陣仗, 仲改左個名叫VIEW62. 以前部觀光LIFT比窄, 裝修完之後唔只部LIFT大左, 個落地玻璃更加擴闊晒, 以前只可以睇到灣仔, 銅鑼灣, 今時今日嘅落地大玻璃可以一次過比你睇晒由金鐘至天后嘅風景...真係更加大開眼界... 當年兩歲嘅雞同今日己經四歲嘅佢一樣都睇到目瞪口呆, 我記得我地次次都係專登又上又落坐4次, 今次都唔例外. 不過, 以前56樓出面唔會有人理我地, 今日, 我發現56樓一早己經有個西裝友拿住一份野等我地出LIFT... 哈哈...不過, 我諗佢好失望, 因為我地只係三個玩LIFT的無聊家庭. 玩完LIFT, 我地就行落去春園街新景園咖喱小廚食飯... 己經8-9年無嚟 "新景園”食豬扒, 因為E間舖頭很早關門, 但係只要你食過"新景園”, 你一定會對佢地嘅炸豬扒一試難忘. 其實, 我係好祟日嘅, 不過, "新景園”一出場, 所謂堪稱豬扒專門店嘅"銀座梅林"或者"丼吉日本吉列專門店"真係要行埋一邊... "新景園"嘅豬扒唔止有豬扒味, 仲要係好有初戀嘅味, 外層炸得又脆, 裡頭嘅豬肉又林, 又鬆, 又香, 咩叫做 入口即溶, 好味到停唔到口呢....就係E度嘅豬扒喇. 都唔明其他"豬扒無豬扒味"嘅地方都可以叫做專門店, 咁E度應該叫做豬扒天王店啦, 真係好食到你會上癮架. 好耐無嚟, 估唔到E度嘅服務態度仲係鬼咁好, 因為, 本來店內寫明每人最低消費係$50蚊, 我地隔離枱就係三個大陸人叫兩個餐, 但係老闆娘話:"唔好意思因為舖規矩, 不如你地叫多一碟菜啦好唔好?" 但係輪到我地落ORDER時, 伙記就同我地講:"你地叫兩個餐都無問題, 因為小朋友無所謂喇" 到後來人愈來愈多, MR雞又食得慢, 又要玩, 我地其實都唔多好意思, 老闆娘來了兩次收了部份食完嘅碗碟, 兩次都話:"唔好意思, 不如我收一收你食完D碟, 唔緊要, 慢慢食..." 其實, 我都知E個係催客人走嘅絶招, 但係好多食肆都只會話:"食完唔要喇係米 ? 我收一收" 點會好似老闆娘咁有禮貌吖... "新景園"真係又好食, 又食得人好舒服, 好野!! 地址: 灣仔春園街20號