霎眼間, 原木寫這編網誌時已經是年半前, (現在所有價錢最少也加了$2蚊) 那日, 本來去朋友將軍澳的生日會, 唔知傾傾下計講開D乜野嘅時候, 竟然講到最好食, 最正嘅炸雞肶, 朋友不停形容, 外脆內 嫩, 不油不鞋, 食足十幾廿年, 試過日日食都今時今日都仲未食嫌, 價錢超抵, $23蚊包凍飲, 仲有件火腿三文治跟餐送埋比你, 佢經常都係一想食就坐VAN仔去九龍灣叫個雞肶餐.... 我都好鍾意食炸雞肶, 近排經常都係我屋企樓下買兩隻返屋企當加料. 不過, 其實我屋企樓下兩間嘅炸肶都麻麻地, 皮就好多時都炸到好乾, 但內裡竟然仲未熟, 生生死仲有少少血, 雞肉唔知點解有陣薑味還是隔夜雪櫃嘅味道, 仲要單一隻賣 $19蚊.... 好, 朋友一路繼續講佢尋日如果唔係太飽, 佢都不知幾想又去食返隻之際, 我即刻上 OPENRICE 睇下D人寫嘅食評... 嘩!!! 真係個個讚, 最離譜係個個都影都隻金黃色嘅炸雞肶脆岳岳咁, 係果刻我己經不停吞口水...唔駛講咁多啦, 坐言起行吧....即刻去日月星買雞肶. 去到九龍灣日月星, 己經聞到好鬼香嘅雞肶味, 因為我地叫左4隻炸肶, 5隻油肶, 老細話太多ORDER, 所以要等耐少少, 所以我地就唯由好心急咁睇住舖頭堂食嘅客人食雞肶啦. 好有趣嘅係, 下午茶時間 14:00 -18:00 雞肶餐賣平$2蚊, 只係$21蚊. 因為我地去到嘅時候都係17:45, 所以我地總共又省左$18蚊. 我見堂食會有手套供應, 不過, 原來外賣係無嘅...有埋就梗係好D啦... 之後我地上返車, 9隻香噴噴嘅雞肶, 真係未食斎聞都己經好滿足, 朋友話九隻肶嘅香味仲勁過佢架車上嘅香精嘅香味喎....十幾分鐘嘅車程, 我拿住有隻雞肶熱辣辣, 其實, 我好想快D可以食左佢地... 正所謂有相有真相, 幾想食都要影幾張相先.... 朋有話油肶要連浸滿滷水嘅膠袋一齊食先會更好食, 所以我地只係將一隻油肶拆出嚟.... 忍唔住啦....真係要試下係米咁好食先得, 會唔會希望愈大, 失望愈大呀.... 結果, 一口大啖咬落去雞肶嘅精華之處, 即係塊皮嘅時候, 己經覺得好滿足啦...味道有D似肯得基, 但係比肯得基嘅嚟得更脆岳岳. 雞皮唔會太硬, 絶對無界口, 正正因為佢落左D野嚟吊味, 所以, 佢個雞皮係同其他人唔同, (對於食得較淡味嘅我嚟講係濃味左少少, 但放至於雞皮上, 真係接受到停唔到口) 之後, 食完塊皮, 就見到佢裡頭嘅雞肉炸得通透，無油, 夠乾又無肥膏又無血痕，食落更力無雪櫃味, 好食又有雞味, 我可以講一定好食過紅磡間「時新」. 今次真係可以話未食先興奮, 食完更感動, 咁鬼平又咁好食真係想連D骨都"損" 埋. 之前我每次去親紅磡都一定食時新同轉角間" 班戟". 以後可能一去開九龍灣都要嚟日月星食雞肶. 今時今日, 沙士, 可樂變晒味, 珍珍, 合味道都唔再係以前嘅珍珍同 合味道. 但係今日我竟然可以食返 以前小學那些年嘅雞肶嘅味道, 舊時嘅感覺返晒嚟啦, 想當年, $4.5係學校對面間快餐店買一隻炸雞肶正正就係依隻味. 八個字形容日月星嘅炸雞肶 : 相逢恨晚!!! 好食到喊!! 電話 : 2758 2153 日月星, 炸雞肶
