北角果然係搵食好地方，有好多唔係連鎖式，而係地點唔近地鐵站嘅隱世小店，今次就同大家介紹一下呢間食星馬菜嘅餐廳-古月。 點解會識呢間餐廳，係因應某天睇雜誌，郭少雲介紹呢間餐廳，而且有米芝蓮推介，咁吸引，於是決心試試。 店鋪小小，無得訂座，勸大家早d黎，因為我平日去，六點九左右，先坐到最後一張四人枱，如果星期六日，應該要排隊。大家唔想等咁耐，就要早d去。 餐牌嘅款式唔算多，見d人多數都係食個幾款，我當然都跟跟風啦，於是我地四人分別點左古月肉骨茶飯，古滑雞飯，喇沙，串燒，仲有三色奶茶。 肉骨茶拍得住新加坡個d, 湯好香胡椒味，味濃帶點辣，而且肉淋，肉同骨一咬就分開，好好味，無哂湯仲可免費添加。 古滑雞飯都唔錯，肉嫩，略嫌d雞唔多入味，可能忘記點佢另上嘅醬料。而且飯有太多汁，耐令d飯過濕，如果乾身d會好d。 喇沙個麵唔係用米線,而係類似車仔麵嘅油麵，所以無咁易過軟身，呢個係我喜歡。料都幾足，有魷魚，豆卜，蝦，唔係得一兩粒個d。我覺得個湯唔會太椰奶味，所以唔會搶過湯本身鮮味，唯一一樣要彈係太辣，對於我黎講，可能我地成匙辣醬都mix左，如果唔太食得辣嘅朋友，請逐步加。 串燒忘記影相，佢唔可以一半豬一半雞，一定要同類，呢個係爭d,而味道就係平時食嘅串燒囉，大家明啦 最後講下三色奶茶，個個客人都幾乎點呢個，我想講，真係飲落無咩特別，睇落就得意，三隻色，個呢三層mix埋，就係同茶餐廳奶茶無分別，如果想影下相，呃下like, 就可以點嘅。一杯都唔平，成三十蚊左右。 最後講講個服務，我覺得有一個waiter真係麻麻地, 好無禮貌，好似好唔樂意幫你落單。不過值得一讚係呢間餐廳會請聾啞人士工作，幫助有殘障人士投身社會，絕對值得其他餐廳學習。 問我再會唔會黎，答案係會。
