遊走荔枝角工廈尋找隱世美食，正宗台灣美食 『程班長台灣美食』 婆婆成日會心思思想走一轉台灣，除咗去做偽文青之外，仲有就係為咗食! 台灣潮語『吃貨』一詞已經出現咗好多年，你冇理由唔知架! 身為吃貨族人嘅我，去唔到台灣當然成日都想食台式野啦，最近都食咗唔少間台式野，但唔好食的居多，有樣冇味，有味冇樣，都係不合格居多，所以從來都唔多介紹香港式的台式野比大家，就算該店點樣表明主打係台式野都係冇特別，當然唔會推介啦! 但今次唔同的確有驚喜，朋友仔介紹，就跟住佢去搵食啦，話哂佢係當區地膽(於荔枝角返工)，今次就跟住同樣係吃貨族一起遊走荔枝角工廈一次，一齊尋找隱世美食啦!就係『程班長』正宗台灣美食嘞!!!! 聽說主理人係由台灣移居到香港的台灣人老闆“程先生”，他期望香港人能真正認識及品嚐正宗台灣料理，當晚發現職員都全是說國語的。唔知佢係咪起台灣當兵的時候係做“班長”呢?! 哈哈~ 食店位於荔枝角工廈中，絕對不起眼的，唔係地膽朋友真係唔知有正野食! 由於係起工廈1樓，環境只屬一般。所以唔好打算環境優美景色怡人呀，係自助形式排隊點餐再由餐廳職員送餐到你的座位上，座位以一大長枱為主，坐得唔太好架，人迫人咁，都有D似去咗士林夜市食野咁，哈哈! 當去咗士林囉都幾好丫!(台控語氣上身) 但最難得係我真心覺得好食，食落去果一下係有驚喜(第一口食『萬巒豬腳冷盆』$32(小)記得點佢嘅汁超讃的)。之後分別點咗，紅燒半筋半肉麵$52、蔥抓餅$20、蚵仔煎$35、手工糯米腸$32；款款都係好好好食呢! 果然係好正宗的台灣料理，起香港真係好難得食到台灣味的食物。但美中不足的係甜點，真係失望的! 點咗菠蘿粉圓(冰)$28(杯上)及紅豆粉圓(冰)$28(碗上)，對咩失望?!? 係紅豆湯!!! 粉圓係OK嘅，好食嘅! 但唔夠九分婆婆粉圓好食，只屬合格。但紅豆呢…最唔MATCH就係紅豆同紅豆湯係分開味道的，紅豆同水咁分開，味道仲冇特別可能因為好水味下囉，加上D冰唔係台式棉花冰嘅質感，溶咗更加水，淡到呢!! 絕對同佢D圖不符(圖片濃濃的好紅)，你話點會唔失望丫! 點擊圖片放大 +5 但整體食物味道可補償這美中不足之處，希望下次再有驚喜，因為仲有好多美食我未選的，下次我都會再幫襯過的! 地址：荔枝角長沙灣道883號億利工業中心1樓102室(MTR Exit D1/D2) 營業時間：星期一至六11:30-21:00；星期日及公眾假期 休息 付款方式：現金 (不設加一服務費) **係自助形式排隊點餐再由餐廳職員送餐到你的座位上**
