<驚險冰川行> 南島旅程嘅第4日，終於黎到重頭戲---行冰川﹗標題嘅「驚險」唔係因為冰川難行，而係爭啲因為天氣情況去唔成﹗ 冰川行嘅前一日就到達Fox Glacier附近出發點，係一個好細嘅town，放低行李之後就過Fox Glacier Guiding 報名，職員本來話早團無晒位，但突然又話最早時間果團有三個位，我地3人剛剛可以join到﹗速速俾錢，NZD$490一位，係成個南島遊最貴嘅活動﹗ 報完名之後其實都仲好忐忑，因為天氣預報顯示第二朝情況一般，職員都講清楚如果天氣唔許可就唔會出發，一切由飛機師決定。退款都有幾種，飛機都未上就會退100%，如果已經起程但玩唔夠3個鐘就會退部分(唔記得左幾多%)。事到如今只好返lodge好好休息，當晚住響Fox Glacier Lodge ，樓底好高嘅小木屋，好靚﹗ 第二朝起身去到集合地點，原來呢團得我地3個人﹗興奮之餘繼續擔心天氣情況，但都要換好晒雪褸雪褲雪鞋，坐車出發去直升機地點﹗終於﹗見到機師，佢確認天氣OK，可以安全起飛喇~﹗﹗果一刻真係好興奮，3人包團上冰川gogogo﹗ 第一次坐直升機，原來感覺係咁free﹗機程好似只係十幾分鐘，慢慢見到遠處山上好似有條河，名副其實「冰川」﹗落機踩上冰川一刻覺得有少少不可思議，好似一瞬間去左無人之境(但其實附近有6、7名員工)。我初初以為「行冰川」真係會行到上盡頭，但黎到現場就知道咁諗太傻喇﹗因為響呢度一定要靠有經驗嘅leader用冰鑿開路，先可以安全地一級級咁行。 我地嘅leader 係來自尼泊爾，佢話好多kiwi (紐西蘭人)都會選擇去nepal行冰川，因為平啲，確實我地見到黎呢度嘅都係亞洲旅客。而leader會響兩個國家各stay半年，佢仲會唔搭直昇機，而係hiking上到黎滑雪﹗佢亦都提到另一個Glacier Franz Josef，果邊原來多人好多，而且冰川無咁大，好慶幸揀左Fox﹗ 我地響冰川行左一輪，又玩左冰洞zip wire，個幾兩個鐘之後見到另一團旅客黎到，有大概10人，呢個時候天氣開始轉差，落雨同起風，所以無幾耐大家都要撤退。我地好好彩已經完成左tour，仲因為要等另一團人坐直昇機走先，所以我地留響冰川玩多左一段時間，周圍影相、試鑿冰，最後先回程~﹗ 成個旅程都好好玩，無想像中咁攰，leader好專業，我地仲好好彩3人包團兼玩多左時間，滿足~玩完冰川，我地就向Haast出發~
