首先感謝每位曾經花時間睇過我首篇文章的讀者. 我會俾心機為大家介紹一些平靚正的餐廳同消閒活動. 基於朋友要求, 今次就介紹我地的集體回憶 - The Big Bite! 此店係一間加拿大式快餐小店, 主線以漢堡為主, 亦唔少得特色肉汁芝士薯條(Poutine), 水牛雞翼(Buffalo Wings)同各式各樣的加拿大啤酒(相信全香港無呢度咁多款可以揀!). 除此以外, 另有西式食物如All the Breakfast, Fish & Chips等供應. 港島區漢堡快餐店林立, 但佢一直深受本地同外國人歡迎, 特別係星期二! 點解? 因為係Wings Night! 逢星期二6pm後, 每買一支啤酒($4x-6x), 就可以以$3一隻優惠價叫水牛雞翼, 有六款唔同辣度任你揀 ,最底為唔辣, 想追求刺激可以逐級挑戰. 不過Wings Night優惠不適用於最勁果兩款辣度, Homicide (採用特辣辣椒所製的醬汁, 聲稱辣到可以殺人!) Suicide ***************** Hot Medium Mild Wuss / Honey Garlic 叫的數量無上限, 但每款辣度最少要叫6隻. 平日賣$9($54 /6隻, 連Celery stick with Blue Cheese Dip), Wings Night只不過係$3, 相當超值! 皆因餐廳地方較小, 主要分為普通枱(5張4人枱 + 3 張2人枱)同高座(4張)兩部分. 而且食物即叫即整, table turnover較慢, 所以星期二極大機會要等位, 上次我地約 7pm左右到, 都差不多等左一個鐘先有位坐... 講番食物方面, 我地當晚叫左The Big Bite招牌漢堡($56) set (+ $46轉), 包Mushroom Poutine同汽水一杯 (可無限添飲, Wings Night除外), 當然仲有重頭戲 - Rogue Hazelnut Brown Nectar Ale (Alc. 6%) + 20隻水牛雞翼! (一半Hot, 一半Honey Garlic) ＿ 原來叫set買啤酒可以有折扣, 原價$56, 折實$35, 變相汽水就要收錢($20), 總計$217. Ale本身麥味重, 較難入口, 出奇地呢支比較mild, 但飲唔出有hazelnut味. Mushroom Poutine好足料, 脆脆薯條配上肉汁同豐富拉絲芝士, 唔使點其他醬都好夠味, 食食下甚至覺得偏咸. 水牛雞翼本身偏向貼近Tabasco果類辣, 味道帶酸, 所以Hot對於本人來說係無難度, 不過第一口個咀都有少少辣痺左, 證明辣度有番咁上下! Honey Garlic幾惹味, 蜜糖味比蒜味重, 略甜但配上炸過的雞翼好夾, 正! The Big Bite 塊漢堡排size唔細,牛味足但未至於Juicy, 麵包同配菜(生菜, 蕃茄, 生洋蔥, 墨西哥辣椒)都係普通貨色, 無咩特別, 醬汁亦沒放太多. 其實...主要都係食塊排 :p 值得特別一提, 佢地有個自助counter俾客人添加配料, 茄汁/芥末之外, 仲有粟米, 酸椰菜, 黑橄欖等, 幾唔錯 :) 由於太旺場的關係, 環境好嘈, 完全唔適合傾計, 加上有人等緊位, 所以我地食完就走, 盡興的一晚! 如果唔想等太耐既, 建議其他日子先去, 九成都搵到位. 地址: 北角渣華道196-202號嘉富大廈地下4B號舖 (北角站A1 出口, 向右直行至中旅社, 隔離就係) 電話: 2327 3263 開放時間: 一至日12:00-23:00 Facebook page: https://www.facebook.com/TheBigBiteHK
