基於慳錢,小妹一至四午餐都以帶飯/用公司的飯券為主, 甚少出去食飯. 所以逢星期六日文課過後,我總會約男友去唔同的餐廳品嚐美食. 辛苦左一星期始終要慰勞下自己! 今日有點想食辣, 討論後我地決定去食川菜 - 渝酸辣粉. 1:30pm左右到, 點知......要排隊 >~< 等候間看看貼於門外的不同報紙雜誌介紹, 此店先後有李純恩,蔡瀾等食家點名推介, 頗有名氣. 幸好15分鐘左右就能入座了. 本人食過一次, 印象感覺良好但已經唔記我確實味道. 男友就第一次試, 所以我地毫不猶豫就揀左佢地的招牌套餐($98, 只供應到5:00pm), 包口水雞, 涼拌三款(木耳 / 手拍青瓜 /毛肚 (=牛柏葉)), 酸辣粉,甜品同飲品. 酸辣粉可選辣度, 由唔辣到加辣, 任君選擇. 酸辣粉先上枱, 隨後口水雞跟其他食物也來了, 逐一為大家介紹! 口水雞個汁鹹香辣平衡得好好, 雞夠嫩滑又有雞味, 好味連伴菜蔥花酸菜同花生米也吃光光! 散叫半隻要百幾蚊, 叫套餐有咁既份量好抵! 酸辣粉揀左少辣, 湯底對我這個嗜辣的人來說唔夠過癮, 麻的感覺亦唔大. 紅薯粉夠煙韌, 配上我最愛的新鮮莞茜,微脆的花生米同香口的瘦肉碎吃著, 整體總算不錯. (P.S.: 建議盡早食, 如果唔係紅薯粉好吸湯, 今次就係咁...) 涼拌木耳同青瓜味道正常, 但唔算太入味, 牛柏葉亦太淋, 一般. 男友中間叫左四川豬肚絲酸菜麵 ($50), 因為主要係佢食, 所以無影到. 佢話湯底相對地比酸辣粉辣, 其他普通. 飲品我地另加入$8轉飲青瓜豆漿, 睇得出有青瓜蓉係入面, 同豆漿味道幾夾, 唔太甜, 頗refreshing. 桂花冰粉, 聲稱有助解麻解辣. 冰粉本身係無咩味, 配上桂花味重的糖水, 好香, 食完有透心涼的感覺, 幾舒服, 只略嫌糖水較甜. 埋單無收加一, 總數$156, 食到咁多野都幾抵. 店內職員有禮貌, 特別一讚男經理, 帶位落單上菜收銀非常有效率, 仲會貼心提醒客人有邊幾樣會特別辣, 整體評價唔錯! 有興趣既不妨去試試, 但請先有要排隊的心理準備! 地址: 銅鑼灣耀華街4號 電話: 2838 8198 小妹初試啼聲, 多多指教. 希望各位會鍾意睇我的文章!
