阿囡就黎生日，又有藉口食餐好嘅 今晚我地揀咗觀塘呢間御膳，地點唔算方便，但有好幾個同事食過都話正，於是我哋就黎試吓。 私房菜要預早聯絡餐廳，揀定菜式，我哋今晚個餐好豐富架 打頭陣嘅係野菌龍骨湯，個湯味道都幾濃但又唔會太鹹喎，入面有好多菇菇同滑溜嘅豆腐。 頭盤係一個拼盤，同事話麻辣拼盤好味，但我哋全家都唔係好食得辣，於是就叫咗個唔辣嘅拼盤！ 拼盤有三樣嘢：豬腸、涼拌雞絲、牛肚。 豬腸最好食，又腍又入味 中間嘅涼拌雞絲撈咗啲青瓜，感覺幾fresh！ 牛肚都煮得好腍，不過我就嫌佢味道重左少少。 之後到菊子魚，好睇又好食！ 條東星班起晒肉變咗一球球菊花，上面淋咗好清新嘅柚子味醬汁，酸酸甜甜咁，中和左炸魚嘅油膩感，大人細路都好欣賞呢個菜式 蒜蓉粉絲蒸蟶子皇，一人一隻！ 蟶子皇落咗生蒜熟蒜一齊蒸，一上枱已經聞到好香嘅蒜味！ 蟶子皇大大隻，用料新鮮，口感爽彈 墊底嘅粉絲仲正，吸晒聖子嘅鮮味同埋蒜蓉嘅味道 之後嚟咗個金絲翡翠鳳尾蝦 呢個餸擺得好精緻，鳳尾蝦肉質爽口，而且去咗蝦殻，食起上嚟好方便。呢個餸嘅顏色睇落好清淡，但食起上嚟味道都幾濃，特別係墊底嗰件瓜，吸收晒高湯嘅味道，略為鹹咗少少。 跟住就到左今晚另一個最正嘅菜式：花雕蛋白蒸大肉蟹 大肉蟹蝦蝦霸覇咁坐喺碟花雕蒸蛋白上面 蛋白有淡淡嘅酒香，老公就最欣賞！ 蟹肉味道鮮甜，口感細嫩，識食一定係咁樣成隻蟹鉗食，非常滋味 食咗咁多肉點都要食番啲蔬菜! 西蘭花同花枝一向都係理想配搭！碧綠嘅西蘭花新鮮爽口，花枝片口感有彈性，成個餸健康又好味 其實食到呢度已經好飽 不過我哋仲有兩個餸、炒麵同埋甜品！ 我哋成日都係咁，點餸嘅時候眼闊肚窄。。 半隻金華玉樹雞味道清清地，金華火腿可能浸過蜜糖，鹹鹹甜甜咁，味道好特別 最後食唔晒啲雞，但金華火腿就食晒囉 不過金華火腿味道好突出，掩蓋左雞嘅味道。 呢個士多啤梨骨係阿囡女全晚最鍾意嘅餸，味道酸甜，食到佢lam lam脷 本身我覺得士多啤梨同排骨呢個配搭好奇怪，但點知出到嚟效果都唔錯，味道新奇，排骨食落又唔會好滯 最後仲有蟹油炒麵同甜品 不過飽得滯，差唔多成碟麵打包咗，一啲都冇浪費 臨走同侍應傾咗幾句，原來兩個人都可以book佢地嘅私房菜，菜式當然無四人餐咁豐富，不過勝在人小小都OK，而且又係免開瓶費，下次兩公婆拍拖食飯都得 餐廳：御膳 Imperial 地址：觀塘敬業街65-67號敬運工業大廈12樓F室 電話：35759567, 90291530
