周末又出去覓食，經朋友介紹，特登去紅磡搵呢間新開嘅日式串燒店，選擇唔算多但勝在重質不重量！ 地獄珍寶虎蝦拉麵 個friend講到個拉麵辣得死我咁款，辣妹梗係要試下啦！ 第一啖擺落口真係嘩一聲！真係辣到飛起，條脷有一分鐘好似冇咗感覺咁，不過食食吓又真係好爽！最後真係頂唔住口水鼻涕都流晒出嚟，都係要攞個碗仔攤凍慢慢食~佢令我諗起18禁薯片，又係變態辣！ 小妹個胃唔太好就唔敢再挑戰啦，不過你中意食辣既就真係一定要試吓！ 隻虎蝦真係有手板咁長！超級有鮮味唔似係雪藏蝦， 絕對對得住呢個價錢！ 招牌串燒 日式串燒都超級有驚喜！佢有部360度嘅串燒機，係門口睇住佢轉下轉下真係幾過癮。 燒雞軟骨串燒都算幾抵食($22/3串),雞翼就有少少貴($16/2隻)但係超級好食！唔知點解可以做到外脆內嫩，一咬落去啲肉汁爆出來！ 紫薯金菇同燒鯖魚就同其他日式餐廳分別唔大，都唔差嘅~ 老闆10分熱情，服務態度非常好，仲同我地講笑話下次一個女仔帶兩個男朋友嚟食串燒打個七折，帶三個比五折。一切都幾好，係差罐啤酒啫！不過咁近黃埔地鐵站，地理位置方便，會再黎食串燒！ *************** 無講大話，隔左幾個星期，再去紅磡，就想食 “串燒”！ 今次係有特別Plan過，就係一心想食日式串燒。一口氣點左鰻魚串、雞棒棒串、黑毛豬串、雞軟骨串同雞翼串。 果然Keep 到水準，老闆認得我，仲有有小食送。佢仲話遲下推出手機會員卡，喺appstore 下載「多喜」手機app，會有優惠收埋比大家！！！ 雞棒棒 日式鰻魚串，呢個只係我食剩一半，原本仲大入份～ 鰻魚串 點擊圖片放大 多喜 Tori-IN 紅磡蕪湖街111號蕪湖居地下C2鋪 23390223
