今日6點要起身，6點半出門，7點前去到婚攝公司，去到就開始一邊食早餐，一邊化妝 Set頭、化妝、換衫，一轉眼，搞掂已經差唔多10點了 我怕妝會太濃，一開始已經提醒唔駛咁濃妝，由其是個咀唔駛查咁紅，不過到最後出黎效果依然都係好濃妝、個咀好紅...... 準備好就真正開始影，我地2個人+ 1個攝影師 + 1個化妝師 + 1個助手，5個人1架車，第1個拍攝點係布達拉宮，係市區入面，搭十零分鐘車，著藏裝係觀景台上面影，效果都唔錯，藏裝係民族服裝，包得好密實，影果時仲係朝早，唔熱唔凍，淨係影相果時太陽有啲刺眼，基本上面向光隻眼係睜唔大，但影相又要面向光先好睇，所以都係合住眼，攝影師嗌1 2 3先睜大，影呢套係刺眼有少少辛苦，都仲OK既 影完1套之後就返去婚攝公司換第2個拍攝點要著既衫，重點係換衫之前記得去定洗手間，另外再將全日要用既野帶齊，因為之後既拍攝點都唔係市內，呢轉出去就要夜晚影完曬先返黎喇 第1個拍攝點係沙化地，係著鮮紅色既裙，換好衫執齊野就出發了，其實所謂沙化地只係由拉薩去羊湖路邊中間有個地方有一小片沙地，完全唔係沙漠，不過影相就一就角度，出黎個效果就會有啲似沙漠，呢個時候已經大約係中午，大大個太陽照落黎，好熱、好曬，但又好大風，大風將地下既沙向上吹，個身查左啲防曬又出左啲汗痴住曬啲沙，頭髮攝住曬啲沙，一講野或者笑啲沙入曬口，睜大隻眼啲沙入曬眼……總之就係眼耳口鼻都係沙，又熱又曬又沙，好辛苦….. 影完沙化地之後就去食飯了，午餐係包左的，味道都OK，食飯時攝影師話，呢個時間去羊湖之前有個地方可能會有桃花，話如果有花既話就帶我地去影，如果無花就唔影咯，睇彩數了 食完休息一下，重點都係要去洗手間，離開餐廳後就無適合著住婚紗晚裝去既洗手間了 (事實上我下一次去洗手間係夜晚返到婚攝公司後)，去完洗手間就借餐廳既地方換婚紗，果度係郊區，餐館老闆應該係住係度，我諗我換衫既地方應該係老闆既睡房…… 換好衫就捉緊時間，繼續出發，影左成朝，其實都已經有啲攰，心入面既諗法係已經過左一半，好快就捱過了 (點知精彩既係後面) ，食飽飯上車馬上就訓著左，訓訓下就比攝影師叫左起身，原來係開左花，都係路邊經過既地方，有1棵好大棵既桃花樹，一行到埋去，攝影師馬上就叫我爬上樹，我o左一o咀，我著住婚紗，棵樹第1個踏腳位有我心口咁高，無任何工具既幫助下，先由助手爬上樹，我再借一借佢既力，由有我心口咁高踏腳位爬上樹，再轉身坐低，不過確實係影出黎效果唔錯，影完樹上就跳返落黎 (我著波鞋)，呢個景確實係唔錯，一張相入面可以影埋有紅色花、白色花、雪山、藍天、白雲，就係咁我地由影4個景既plan，變成影左5個景啦 之後就繼續行程，下一個拍攝點係羊湖觀景台，因為影花景係突然加既，所以花景同羊湖觀景台都係著同一套衫，去到羊湖觀景台 好 ‧ 鬼 ‧ 死 ‧ 大 ‧ 風 =o= ~~~~~ 原來沙化地果啲唔算係啲咩大風，呢度既大風真係好似打風咁，唔單止大風，仲要開始陰天，觀景台係高地，當風位，著住low cut婚紗，真係吹到d皮膚變曬樣，由手臂到手背，皮膚發紫 本來好期待既羊湖，出黎既效果反而無其他咁好，可能影果時係陰天，無自然光係爭啲啲，就算之後執相都係爭啲咁，呢個時候其實已經比啲風吹到無咩反應，個人有啲呆呆濟濟 影完之後就終於去最後一個拍攝點，開車之前要換最後一套衫，但其實係無適合既地方換，唯有係車換，附近無咩人，化妝師係女仔，就幫我換，其他男性工作人員就另轉身，就咁係車上面就換衫啦 (著好曬內衣同打底褲的) ，其實呢個時候工作人員叫你做咩就做咩，有點行屍走肉既感覺，係換最後一套衫之前，其實我既下身一直都著住一條有少少厚度既legging，上身都有girdle (起碼都叫做條腰有啲野包住)，而最後一套既衫，係大露背加短裙，所以legging 同girdle都唔可以著…… 最後一個拍攝點係羊湖邊，本來化妝師準備左對高踭鞋比我 (唯一一套見到鞋既衫)，但係石仔地下，平時無著開高踭鞋既我根本行唔到路，所以好快我就放棄左佢，赤腳行算數，雖然落返去湖邊，係無頭先既觀景台咁大風，但湖邊依然係好鬼大風，再加上我除曬所有保得下暖既野，同埋我已經得返半條人命，影呢一套既時候，個腦其實已經一片空白，一心只想快啲收工，影左一輪之後，攝影師好似仲未諗住收手，我都忍唔住同佢講係咪差唔多，佢居然答我影多幾張先，OKOK，其實我已經無能力反抗，只係諗住快啲影完，影多一陣之後，終於叫收工了…… 簡直有解脫既感覺 之後就開車返去，一上車就馬上訓著，真係太攰了，返到去婚攝公司已經係晚上8點幾，換返自己既衫，約定隔日時間揀相，就返旅館休息，返到旅館已經9點幾 返到旅館請阿姨幫手煮2碗抄手，其實我已經一啲胃口都無，食左2-3隻已經食唔落，成面厚厚既化妝品，成頭都係gel，只係好想快啲落妝洗頭沖涼……
