行程第3日，約左中午試衫，訓到好晏，起身刷牙洗面就趕住出門口了，早餐都無食 婚攝公司門市鋪頭係太陽島，由旅館搭的士去大約十零分鐘 其實我地係約好時間既，但去到要等，佢叫我地半個鐘後再返黎，點解？我都唔知，總之佢就係話咁，係中國旅遊真係要放鬆心情，唔好同佢計較，講都講唔通的 咁既然要等，咁就去隔離食啲野先咯 食完上到去就有職員同我地傾啦，呢日主要係確定景點，揀衫 (事前係無話比啲衫既相我地睇下先既，佢只係比啲佢地相既版比你睇下，亦都無得hold衫) ，另外就係同攝影師講一講大約想要咩style 首先就係要recomfirm我地係影邊幾個景 我地最後係確定揀左布達拉宮 + 沙化地 (扮沙漠) + 羊湖觀景台 + 羊湖邊 確定景點後，再黎就揀衫，原先我地準備左一套便服，諗住其中一個景影便服既，不過sales姐姐就話我地揀果幾個景都唔襯便服，叫我地揀返佢地果度既衫，最後都係有聽從人地既專業意見，佢推薦布達拉宮著藏裝，沙化地著鮮紅色裙，羊湖觀景台著婚紗，羊湖邊著花裙，其實呢幾個建議應該係佢地眼中已經係一個配套，個個都一式一樣，不過一來我地無咩所謂，二來對香港黎講去拉薩影點都係好冷門，所以我地依然都係聽從人地既專業意見 揀定左每1個景配合既衫既style之後，就真係再揀果件衫 布達拉宮：藏裝，呢個無得試，佢係電腦開出黎，比你去揀 其他既就會有得試上身，有分免費區同收費區，首先帶左去免費區度睇，一間房密質質全部掛滿曬裙，眼花撩亂，之前傾個package果時有送到1件可以係收費區度揀，其實究竟件衫係咩區都係任得佢講，實在太多衫，最後我都係叫服裝姐姐推薦，最後佢每個款推薦左1件，問佢有無其他選擇，佢再拎第2件出黎，但其實都係佢推薦既第1件好啲，所以我諗呢啲可能都係有好曬配套，佢就係想你揀果件衫，d頭飾、飾物、鞋化類，佢就係話聽日會幫你襯好，即係無得揀，而男裝衫佢就話總之會幫你執4套襯返女裝既，問一問size就ok，揀都唔駛揀、睇都唔駛睇、試都唔駛試 揀完衫，今日工作就已經搞掂喇，由頭到尾大約都係個幾鐘島 到呢刻為止既感受係，服務態度係ok既，不過其實選擇唔多，要自己本身要求唔高 (或者直頭無咩要求) 先會適合，而我就係無咩要求果種人 (我既要求只有影布達拉宮同羊湖) 離開左之後就向住旅館方向周圍行下，沿路睇下旅行社，想報團去納木措，但當唔搵果時覺得周街都係旅行社，要搵果時就行極都唔見，不過上網隨便搵一搵都好易搵到 隔日就係影相既日子，另一半既腸胃間唔時會唔好，為左穩陣起見，今晚晚餐去左食KFC，早早食完晚餐，買左個包做第日早餐，就返旅館沖涼、敷mask、訓覺咯
