點解要去西藏影？無得解釋，反正除左西藏，我無其他選擇 咁既然地方已經揀好，之後就決定日子 作為1個香港普通既打工仔，假期係重要既考慮因素，再平衡埋假錢同埋天氣，最後係決定係搭住復活節假期出發，實行請4放11，yeah~ 日子都定埋，跟住就要諗下點影法 我身邊都無人去過西藏影婚照，無人可以問意見，都無人可以比到資訊我 咁唯有就靠自己了 其實係可以係香港請一隊人 (攝影師，化妝師，助手)，再買/租婚紗禮服、飾物、道具 但咁樣既成本太高，我其實都負擔唔起呢個玩法 香港亦都搵唔到有婚攝公司搞去西藏影相既plan (當時搵唔到，後來影完之後有係金都見過，又或者其實當時都有，只係我搵唔到？) 所以就開始搵當地既婚攝公司 點搵？好簡單，就係google 其實拉薩係有好多婚攝公司，不過我地既心態都係諗住穩陣啲，情願貴少少都揀間比較大既 問左幾間價錢後，揀左間當地比較大既 (或者係最大既) 黎問詳情，最後都係揀左呢間 因為無人試過，所以都要厚住面皮，所有野都問到清清楚楚，前期服務都幾好，有問必答 佢有好多plan，影唔同既天數，去唔同既景點，包唔同既後期產品，包幾多套衫，包執幾多張相，各取所需吧，每個人既需要都唔同 我既需要係唔多，我心中就係想影布達拉宮+羊湖，要曬所有底片，咁就來來回回同鋪頭既Sales傾，最後join左個實價RMB¥9099既plan (2016年3月的價錢)，揀好之後就比錢，要比曬全數，我地無中國戶口，過唔到數，就通過淘寶比錢 事前係無咩野需要係香港準備，當地會提供好曬婚紗禮服飾物 出發時要帶定USB手指，女生只要準備內衣、打底褲，男生準備皮帶就可以了
