慢遊豬好鐘意韓國,所以每年都去,好似番鄉下咁,只不過當去到第四次第五次既時候,就會想中途搵兩三日去遠少少,唔會成個假期都留係首爾。 講到首爾近郊,好多時都會去江源道,除左好出名既南怡島(남이섬)、小法國村(쁘띠프랑스)、晨靜樹木園(아침고요수목원)之外,春川市都係一個幾唔錯既選擇! 慢遊豬同朋友仔今次春川兩天一夜自由行既行程如下: Day 1 弘大出發 → 鐘路五街: 孔陵一隻雞 → 清涼里站乘搭ITX-青春列車 → 南怡島 (加平站) → 春川市 (春川站) → 民宿拎房: Someone's Page Guesthouse → 炭燒辣雞排 → 回民宿 Day 2 Someone's Page Guesthouse民宿出發 → 九峰山咖啡一條街 → A TWOSOME PLACE → 산토리니 Santorini →昭陽江Sky Walk → 昭陽江少女銅像 → 春川站乘搭ITX-青春列車回首爾 Day 1 第一站: 孔陵一隻雞 由弘大出發的話,首先搭地鐵去到市廳站(201 시청역)轉乘1號線,係鐘路五街站(129 종로5가) 落車,5號出口行大約5分鐘就到。 慢遊豬大約早上10點幾去到,陳玉華老奶奶元祖一隻雞已經幾多人食緊,孔陵一隻雞就一個人都冇,連燈都未開晒,初初仲以為佢未開門。 孔陵一隻雞2人份KRW20,000(HK$140)、3人份雞KRW30,000(HK$210)、4人份雞KRW40,000(HK$280)、年糕1份KRW1,000(HK$7)、薯仔1份KRW2,000(HK$14)、刀削麵1份或者粥都係KRW2,000(HK$14)。 飲品方面,燒酒同啤酒都係KRW4,000(HK$28)、可樂KRW2,000(HK$14)。 孔陵一隻雞既價錢同陳玉華老奶奶元祖一隻雞差唔多,味道方面慢遊豬自己覺得大致一樣,口味既野人人都唔同,有人話孔陵一隻雞好好食,亦有人話陳玉華老奶奶元祖一隻雞比較正,所以都係試過先知,雞都一樣咁滑,係相對上比較濃味。 孔陵一隻雞 地址: 首爾市鍾路區鍾路5街249號 서울특별시 종로구 종로5가 249 營業時間: 10:00 ~ 24:00 Day 1 第二站: 清涼里站乘搭ITX-青春列車 慢遊豬係由鐘路5街站搭到清涼里站(唔洗轉線),然後清涼里站乘搭 ITX – 青春列車去到加平站,大約40分鐘,再轉的士去南怡島碼頭。 如果想直接去春川,可以係清涼里站乘搭 ITX – 青春列車去到最後一個站春川站,車程大約1個鐘左右。建議預先網上買飛,即日買飛如果多人就有機會冇坐位,要企足全程會好攰。韓國Korail 網上買飛已經有中文版,非常方便,而且預訂程序都好簡單,不過目前只有簡體字既版本。(Click: 網上購票) 請留意只可以早30日前預購,但可以預先睇左時間先。 之後搵番適合既時間,按「選擇」後填個人資料,按放大鏡圖案可以睇到票價。 票價方面,劃位票價雖然貴少少 (成人HK$45 ; 小童HK$22),好處係有電腦劃位,確保有坐位。自由票價大部分都係企位,每架列車其中有兩卡車(冇記錯就係第4、5卡),每卡都有6個先到先得既坐位(兩卡車一共12個),其餘都係要企,不過,如果坐位未有人上車就可以坐住先。如果想平又想坐,就要早d落月台排隊啦! 清涼里站 至 春川站票價: 清涼里站 至 加平站票價: 最後一步就係付款,用信用卡比錢係接受VISA, MASTER, AMEX, DINERS, JCB。 完成預約後仲有一個非常重要既動作,就係要print張確認證明出泥,因為售票處職員唔會接受你show個電話比佢睇架~ 如果買來回車飛,記得去程同回程都要print出泥。 另外,Korail「幫助」有提及取消預訂同埋退款安排。 網站冇提既一點係即使預先買左車飛都有得更改!事源慢遊豬就係眼殘買錯日期,仲要當日食緊雞先發現,一日遊就話冇咩所謂可以自己改行程,但民宿一早比晒錢Book好晒臨時臨急冇得改,本身打算去到售票處再即場買過,仲擔心分分鐘要係車站等一個鐘先,因為原本列車出發一個鐘前就吾賣飛架喇,點知去到問佢有冇得改,佢話有!!連最近開出果班車都可以(果陣仲有大約15分鐘就開車),果下真係勁開心,不過因為坐位已經冇晒,連下一班車都full晒,所以由劃位變左自由位,當然係冇得坐啦,因為去到月台已經好多人排緊隊,但係上到車已經好開心。 係清涼里地鐵站行去ITX月台以及取票可以參考 123一起出發吧 既教學文章,慢遊豬第一次去既時候都係跟住佢教咁行,寫得好詳細,好易就搵到~~ (雖然係2014年既教學,但路線係冇變架!) Day 1 第三站: 南怡島 係加平站搭的士去南怡島碼頭(KRW3,000 HK$21),入南怡島除左搭船(KRW8,000 HK$56),仲有一個更好玩既入島方法 - Zip Wire!!! 點擊圖片放大 價錢係KRW38,000 (HK$280),係貴既,不過唔係周圍都有得玩,為左體驗下,貴就貴一次咁多啦! 搭升降機上到去,會有職員講解,首先會問大家咩國藉,知道有遊客會用英文加身體語言講一次(其實主要係睇下在場職員識咩語言啦),教你點坐、提醒飛緊既時候唔好做咩動作等等...另外,手袋或者背囊係要自己"咩"住,如果著住拖鞋要除鞋放落袋或者拎住,不過大部分人都應該著波鞋既。 講解大約10分鐘啦,就排住隊準備飛過去,等緊既時間,大家都係不停咁自拍。上面呢張係職員叫我地埋去話幫我地影番張留念架~~ 偷影左張前一對出發既情侶~ 飛過去既時間其實好短,都唔知有冇1分鐘,但天氣好又好風,真係好好好玩!!如果唔洗攬住個袋會更爽! 呢張係島上攝影機影既,飛到一半可以準備定pose影相,當然係要比錢先比相你啦,價錢唔記得,有分print相或者通過Line send 相比你,到時自己揀。 入到南怡島想知有咩睇有咩玩可以參考番之前分享過的: 【韓國。加平】秋天快到,追楓必去南怡島!上/ 【韓國。加平】秋天快到,追楓必去南怡島!下/ 【現時實況】楓遊韓國 – 再訪南怡島 【南怡島訂房】靜觀樓호텔정관루 預約教學 Day 1 第四站: 春川市 搭番的士出加平站,由於慢遊豬唔知係南怡島玩到幾點先走,所以冇買定ITX去春川站既車飛,我地5點係等京春線列車(普通地鐵),係月台坐左好耐,我地睇番頭先d相、吹水、自拍...做左好多無聊野先等到車到,一上車就訓到落車,所以我都唔記得搭左幾耐啦,去到春川站天已經黑晒。 春川站同春川市內都有一段距離,如果時間尚早都可以行過去(大約20分鐘),因為天黑晒又好肚餓,好想快d去到民宿拎房再出去食野,同埋見到好多同車既學生們都係齊齊打的,所以慢遊豬同朋友仔都決定搭的士去民宿~~~ 慢遊豬當時係同司機講係銀行附近落車,然後行入去,5分鐘都唔洗就到,KRW3,000(HK$21),行到門口再聯絡民宿主人。 夜晚冇影到相,第二朝走補影番,呢度行入去就係民宿啦~~ Day 1 第五站: 到達民宿: 썸원스 페이지 (Someone's Page Guesthouse) 慢遊豬同朋友仔係住2樓既2人房,一上到2樓就見到一大一細Ryan,右邊有一間細細休息室,有水機、微波爐、雪櫃,仲有書同DVD,民宿主人話歡迎大家拎去睇,不過全韓文啦。1樓有間Cafe,不過我地夜左到,已經閂左了。 點擊圖片放大 民宿用鎖匙開門的,所以鎖門果陣要確保真係鎖實先好走丫!開左房既大門之後,要開多一度門先係睡房位,入到去間房同網上睇既相一樣樣,佈置好似細個既睡房咁,窗簾同床上既公仔都好有童心,入到去個感覺非常之好!!廁所好大同乾淨,花灑水量強、水溫都好穩定! 仲有就係民宿主人係好友善,好主動問我地會去邊,然後教我地點去,仲話有咩問題可以massage佢,而且都好快覆。 整體上都非常滿意! Day 1 第六站: 元祖炭烤辣雞 (원조숯불닭불고기집) 春川辣炒雞排係最出名,春川明洞有成條街都係春川辣炒雞店,不過炒雞呢慢遊豬已經試過幾次,所以今次想試下炭燒雞排!由民宿行去元祖炭烤辣雞店,大約用左10分鐘,差唔多7點去到,撞正食飯時間,所以係門口等左一陣,呢間鋪都幾出名,韓國節目都介紹過。 入到去叫左無骨雞排2人份,無骨雞1人份KRW10,000(HK$70),有骨雞排1人份KRW9,000(HK$63),雞排到左係預先醃過,味道唔錯,而雞肉都好嫩滑,慢遊豬個人鐘意炭燒多d。佢有個菜藍提供,有生菜、唔知係咪紫蘇葉定芝麻葉、青陽辣椒...另外仲有生蒜(超鐘意燒蒜頭)。 中途再加碗大醬湯KRW2,000(HK$14),配燒雞好正,最正係放係個炭爐上到係Keep住熱辣辣!叫個白飯就KRW1,000(HK$7),冷麵就KRW6,000(HK$42),慢遊豬見隔離枱班大叔都有叫。食炭燒雞排配燒酒或啤酒應該爽d既,不過我地每晚都飲燒啤,已經飲左一個星期,所以今餐就飲可樂...附近幾枱都係得我地叫可樂。可樂每支係KRW1,000(HK$7)。 食飽飽之后出番去大街有好多鋪已經閂晒門,我地行左去春川明洞街度睇睇,發現係冇野好行,化妝品鋪有The Face Shop、Etude House、Tony Moly、仲有幾間運動用品鋪,平時都成日見,所以慢遊豬覺得冇咩特別,可以唔洗特登去行。然後我地就行番番民宿啦~~ 元祖炭烤辣雞 (원조숯불닭불고기집) 地址: 江原道春川市中央路2街70號 강원도 춘천시 중앙로2가 70 江原道加春川兩天一夜既第一日就結束,第二日主要係春川遊,會上九峰山咖啡一條街,仲會去春川新景點 - 昭陽江Sky Walk。一次寫晒2日既行程實在太長喇,決定分兩篇~~ 下篇繼續江原道加春川兩天一夜DAY2!