上回講到去三清洞租借韓服，變身古代韓妹，下一個行程就係去試家庭式的傳統韓定食 - 青受亭。由韓服租借店一直向上行，沿路有好多店鋪、小食店、Cafe...大多都保留傳統韓式建築特色。 青受亭既外觀都非常傳統~~ 下午1點幾去到要係門口等一等，途人行過都望住呢兩個去錯時代既人~~ 點擊圖片放大 +2 有間2人房比我地(要先脫鞋)，閂埋門完全係二人世界，唔知係咪我地條裙太阻定XDD 但著住韓服食傳統韓食真係好有feel~~ 今日仲唔係穿越時空？約食飯一於約去朝鮮食個lunch啦！！ 2人份傳統定食放到成枱都係小菜，感覺超豐富，一共有16碟小菜，以及3個鍋(泡菜鍋、純豆腐鍋、牛肉鍋)，價錢方面係每人KRW 18,000 (HK$124)，相對來說係比較平價，家庭式韓定食既小菜比較簡單，唔會好華麗或者有太大驚喜，食物質素都唔錯，好有屋企媽媽的味道。如果想要有驚喜可以去食宮庭式韓定食，當然價錢都會貴d。只係想體驗傳統韓定食既話，青受亭係唔錯既選擇。唔好睇佢每碟得果少少，覺得會唔夠食，其實食完真係會好好好飽！ 食飽之後慢遊豬去左超有feel既懷舊Cafe - 咖啡磨坊飲咖啡，唔飲咖啡既你可以去嘆番杯茶 - 五嘉茶 오가다 青受亭 地址: 서울특별시 종로구 삼청동 88-23 首爾鐘路區三清洞88-23 營業時間: 11:30 - 21:00 P.S. 青受亭有店員識中文架 地圖: 睇落好似好遠咁，其實由地鐵站出口行15-20分鐘左右就到架喇
