來到韓國，一定會想試下韓國人氣美食，比如: 蟹油蟹、生牛肉、生章魚、冷麵等等。講起最多人鐘意既醬油蟹，最近多左好多任食店，慢遊豬都試過，食左少少就好快滯，其實都食唔到好多，計落都唔係好抵。如果你唔係好大食，又想試多幾樣野，弘大的麻浦渡口之家 마포나룻집就岩晒啦！ 慢遊豬同3個朋友分別叫左蟹油蟹、生章魚、牛骨湯同埋冷麵。有朋友唔食辣，原味冷麵都好好食，不過個樣冇咩特別就冇影相，但佢攝左鏡架。麻浦渡口之家的生章魚冷麵感覺更吸引，是辣的，加上原隻章魚上，店員會幫剪好，下次去一定要試下XD 小菜都幾多架~~ 中間果兩個飯其中一個係另叫的。冷麵隔離有碟似係鱿魚既小食，作為下酒菜正！ 牛骨湯不過不失，喜歡清淡既朋友可以試下，佢真係超大舊骨上，霸氣牛骨！不過食果陣會有少少麻煩，唔知由邊度咬起，最後拎左剪蟹把鉸剪剪XD 生章魚！！낙지！낙지！慢遊豬既至愛，上枱果陣仲非常生猛！(朋友話我食佢好殘忍)，放入口仲會吸住條脷！同再上次係鷺梁津食既一樣咁新鮮~~但唔洗山長水又遠。 一碟係KRW15,000。 到成餐既主角 - 醬油蟹(간장계장)！可能興奮左少少手震左tim~ 呢間唔算好平，不過品質好，好新鮮好好食，一定要叫多碗白飯連蟹膏一齊食！慢遊豬叫左小份KRW19,000，有1隻蟹，如果叫中份有2隻蟹送埋白飯，價錢係KRW36,000。 麻浦渡口之家唔係大件夾抵食，價錢中等，不過質素係好既，值得再去！另外，店中餐單有中文餐單同埋相，所以唔驚睇唔明。 2016年10月慢遊豬又番韓國啦！今次再去麻浦渡口之家，今次同朋友叫左大份醬蟹、海鮮煎餅，醬蟹Set價錢係KRW36,000，除左有兩碗白飯，仲送左泡菜湯，雖然係送但幾好飲架。仲有，食煎餅飲冬冬酒 (馬格利酒) 都非常有feel，因為酒係用碗裝架！ 店中播住懷舊歌，有聽到《請回答1988》既歌~ 點擊圖片放大 醬蟹一定要配白飯食！ 海鮮煎餅超大個，同一個Pizza大批差唔多大，價錢唔洗KRW20,000，佢比較薄身，所以邊邊係脆的，海鮮都幾足，煎餅有加入辣椒，慢遊豬同朋友都食中左粒辣椒籽，果下都真係好辣XDD，但本身個煎餅就唔辣既，唔食辣既朋友食果陣小心d同埋挑走佢就得架啦~~ 今次兩隻吃貨來食，一共叫左3樣野好似好少野咁，但樣樣都好大份，2個人其實食左4個人既份量。所以慢遊豬建議2個人來的話，叫小份好啦，唔好做大晒鬼~~ 麻浦渡口之家 마포나룻집 麻浦渡口之家位於弘大熱鬧的停車場街，店鋪裝修復古，一共3層。行完街去食就岩晒啦，又或者宵夜都好正！(好邪惡) 位置方便，但門口唔係太明顯，好多時會直接行過就算，冇記錯的話係Etude House隔兩間鋪左右。 地址: 서울특별시 마포구 서교동 364-19 首爾特別市麻浦區西橋洞 364-19 (弘大入口站 9號出口) 營業時間: 星期一 11:20 - 22:30 ; 星期二至六 11:30 - 7:00 (第二日朝早) ; 星期日 11:30 - 3:00 (凌晨)
