為左體驗便便既滋味,來到仁寺洞唔係去飲茶,而係去左俗稱「人人商場」既 쌈지길 (Ssamziegil),呢間便便主題Cafe - 또옹카페 Dong-Ong Cafe位於商場的4樓。 香港曾經都有一間便所餐廳,入面的櫈、餐具都係廁所會見到的,比如: 馬桶。而仁寺洞既便便Cafe的概念都差唔多架,Cafe 入面的枱枱櫈櫈都是木製,感覺上舒服悠閒一點,個人認為佢既便便造型既食物、裝飾品就比較可愛。 呢度仲有便便紀念品賣、有「便」條留言,仲有好多便便造型咕臣可以影相,因為當日係下午時間過來,Cafe 都幾多人,所以冇影太多相~~ 係呢度便便隨處可見,幾乎每張枱上面都有一舊屎,大大細細唔同款唔同色都有,等野食就梗係要同佢影下相~ 融入了便便既世界~~ 呢個用馬桶裝住Rose Latte 장미라떼,玫瑰花是真花來的,鮮花放在馬桶上。(明明之前睇相是屎屎的樣子,最後出到泥得番心形拉花) 玫瑰香味同咖啡夾得好好,又夠滑,但隻杯好重,拎住飲都真係幾攰。 呢個便便窩夫 또옹와플,3件連1球雪糕係KRW 12,000,雪糕有2-3款味可以揀,食便便!開動!窩夫即叫即整,外面脆脆地又唔算硬,並不是虛有其表,幾好食架~~ 如果3件太多食唔晒的話,有1件窩夫加1杯野飲既套餐 (KRW 8,000)。 Cafe 門口都有賣便便燒餅,每件KRW 1,000,有紅豆餡同朱古力餡,個感覺更似在食..... (太掛住食係連相都冇影) 去開Ssamziegil商場行街既你地,可以去埋4樓既便便Cafe喔~~ 또옹카페 Dong-Ong Cafe 地址: 서울특별시 종로구 관훈동 38 4층 首爾鐘路區寬勳洞38號 4樓 在3號橙色線安國站(328)或者1號深藍色線鐘閣站(131)出都好快到 營業時間: 10:30 - 20:30