放假既時候,有時總會手痕,哩到摷下個到摷下,點知摷摷下D舊野既時候,發現一個膠袋,入面竟然係PACK住既化妝品呀!!!入面竟然有2支9年前好鐘意既指甲油呀!!! (其實之前一直以為我既無手尾,所以2支野比人掉左...) 2支野雖則話收埋都成7~8年,但D油竟然好神奇,竟然未乾呀!!!(有一半乾左一邊,但另一支係乾既痕跡都無呀!) 話說當年係朋友S話佢阿姨既老爺間指甲油批發公司執笠,所以拎左好多指甲油去佢屋企,叫我得閒就上去揀返D既返自己用喎~(因為朋友S以前鐘意作男性化打扮多D...) 有一日同"佢"行開個頭,咪順便自己上去快快隨隨揀完再去拍拖囉~點知朋友S話未見過"佢"&話如果佢唔一齊上就2~3個鐘都唔會比我走... 所以最後都係拍住拖上去揀指甲油,初時揀當然係揀D自己會用自己鐘意既顏色LA~但揀揀下又想試下其他顏色(黑,白,深藍...)出黎效果係點喎~ 所以揀左個無人性既決定,拎男友D手指出黎試色LA!(哈哈~),初時其實唔係好殘忍,只係抹下個D顏色出黎係點姐,但唔知點解慢慢唔理咩色&愈塗愈出界喎(所以隻隻真係連D邊都係~)...好快10隻指甲就咁玩完~本來諗住叫佢拎埋D腳指出黎玩既,不過男友死都唔肯,所以唯有搵洗指劑...搵左好耐終於唔知係邊搵到D洗指劑LA~不過搵唔到落妝棉喎,所以就用TISSUE頂住先~但又點抹都抹唔乾淨喎~ 最後唯有向朋友媽媽求救LA!朋友媽媽見到第一句話:"乜你(佢)咁慘呀~比佢地咁蝦你,你都唔出聲~",個下佢尷尬到嘔呀!之後就係房入面拎左袋棉花出黎比我地幫抹LA~但抹極指甲邊D色都係抹唔走喎!!!所以大家都決定放棄... 第二日返到學校,佢就拎對手出黎話: "噚晚返到屋企,係咁抹都抹唔走呀~唯有用指甲磨,磨到都色唔係到..."聽到之後真係有點內疚,不過又的確好好笑喎~ 自此之後哩到佢亦比朋友改左一個代號"指甲油"!!!
