如果放假時要出街，而要去的地點，又有好多款交通工具比你選擇，你會揀鐵路？小巴？還是巴士？我本人，就一定係揀巴士了。因為鐵路多數都無位坐要企到落車，而且人太多成日都覺得好焗…😵至於小巴，又次次都要賭運氣。有班司機係漫步人生嘅模式，雖然係比正常時間慢少少，但就可以安心訓多次覺。而有班司機要追求高速模式，係CHOK到唔會訓到覺，仲FING到想嘔…🤪所以，喺唔想焗熟自己，又唔想用盡運氣嘅情況下，我寧願揀行得慢及站站停嘅巴士。🤣其實坐巴士都唔係咁難過啫~就以我自己為例，訓得著那天當然唔使煩啦，如果訓唔著咪打下機睇下小說囉，咁突然間唔想打機的話，又可以望下街，而有時望望下街，聽到附近乘客嘅對話，真係忍唔住想大笑的。🤣🤣🤣我之前返工係坐巴士的，而路程係第2個站上車直到總站，所以我多數都係有位坐的。某天，我上巴士後走去樓上，坐咗喺車頭位置的第2排窗口位，咁我的前排是車頭正玻璃位置，坐咗對小朋友，係小男孩+小女孩，而佢哋爸爸，就坐咗喺隔條巷的車頭位。男孩：妹妹，你知唔知老師點解咁惡？女孩：唔？因為唔乖，唔聽話囉。男孩：唔係呀，你要再估呀。女孩：咁呀…係咪因為唔記得咗？男孩：點解唔記得咗？女孩：老師唔記得咗笑，所以咪惡囉！(我笑點太低，已經掛住咗個笑樣了🤣)男孩：哦，即係好似媽咪咁呀？女孩：好似媽咪咩呀？我唔明喎。男孩：上次呢，爸B收工冇買蕃茄，跟住同媽咪講唔記得買，媽咪笑住同佢好叻仔，唔記得惡啲罰佢。女孩：係喎，媽咪唔記得罰呀！男孩：唔，就係咁啦…(頂，個笑樣真係忍唔到，好想JOIN佢哋一齊傾😂)爸爸：……你哋要細聲啲講嘢哦，知道嗎？男孩：哦，知道爸B。女孩自以為細聲咁問：咁老師點解咁惡？係咪唔記得咗呀？男孩壓低咗把聲答佢：唔係呀，係因為老師=怒獅，憤怒嘅獅子咪惡囉！我忍唔住望向車頭玻璃嘅倒影，見到佢哋對望咗一眼後，就"卡卡卡"笑到變咗蝦米咁。可能，個笑話對成人來說唔係非常好笑，但見到佢哋笑得開懷，心情實在不錯。最緊要的是：那天係星期一，假期後的返工日，每星期裡面最唔想起身返工的一天！不過，就係因為早上呢段小朋友笑話，令我那天心情不錯，於是，輕易就捱過咗那個周一了！🤣🤣🤣🤣🤣
