唔知係自己老咗無以前咁有意欲睇戲，還是太少渠道去接觸有甚麼新戲上畫，近幾年都好少入戲院睇戲了。記唔記得人生裡第一套入戲院睇的係咩戲？我其實係記得的，但比較離奇嘅係……我唔記得戲名、唔記得劇情、唔記得演員；但記得深水埗的戲院名，記得係婆婆同我二人進場，同埋記得……係咩嘢類型嘅電影！！呢單嘢真係要多謝婆婆，如果無佢我邊記得首次入戲院嘅『奇景』？由我懂事起多數都係婆婆湊我，因為婆婆唔識字，學校事情佢幫唔到我，所以做功課或者睇書我都自動波，佢覺得我幾乖但又唔知點去獎勵。因為以前無親子遊戲，佢唔知要同我玩乜，佢成日都會覺得其實我係好悶的，所以一到假期，佢都會帶我行下街。但佢當時開始步入老年了，而佢熟悉的地方僅限於石硤尾，要佢去公園陪跑或者去玩兒童遊戲，佢力不從心玩唔到之餘又怕唔見咗我，所以成日都只能帶我落樓下活動。後來有個周末，因為佢要去深水埗買嘢，好理所當然咁拎埋我一齊出街去啦，就是咁，我呢段兒時回憶神展開了~~~當日在深水埗買完嘢之後，在等過馬路期間，婆婆同我閒談---佢：好似好耐沒帶你來這邊了？我：(當年石硤尾去深水埗多數坐小巴的)係呀，我好耐無坐那個小巴。佢：(當時係正午吧)我都好耐沒來了，而家咁早，你有無地方想行呀？---當時咁純真嘅我，又點會有行街嘅需要呢？我：(陪婆婆買完嘢已經成身汗)呀？唔知呀。佢：前面無咁曬，去睇下有無嘢行？我：(細個時覺得行街好攰)我坐一陣先好唔好？佢：好，過咗去先，夏天屋企都好熱呀，呢度可能仲通風，抖完行多陣吧好無？然後行到去現今嘅黃金商場門口，婆婆突然間有點興奮咁用力揸實我隻手，佢：喂喂喂，你係咪攰呀？你好似未入過戲院？不如婆婆帶你睇戲吖，有嘢睇又有位坐。我：(當知道有得坐而且能第一次睇戲，我都好HIGH)好呀好呀好呀，我哋睇乜呀？佢：唔知有邊套戲睇呢？過去望下先啦。當年，我呢啲小蟻民家族都好少睇戲，成年人放工睇電視時間已經唔多，細路仔做完功課都會衝去公園玩，感覺上睇電影呢件事，係可有可無的。而且每張戲票都係錢，一家幾口條數好襟計，所以我一直都沒睇過戲。喺我心目中，戲院外面的都係大圖畫。每次經過都輕易被色彩繽紛嘅圖畫吸引眼球，在沒花絮、沒APP直播或trailer的年代，我哋兩婆孫企喺街望咗一陣幾幅大圖畫，之後好似有所決定咁大踏步入咗去。呢間戲院的門口我路過了幾次，但真正行入去係第一次，我好緊張咁拖實婆婆，一直四圍望，見到有部紅噹噹嘅機(其實我到而家都唔明，點解當年的戲院大堂會出現呢部機……)，嗅到啲人拎住烤魷魚等入場，望到婆婆去玻璃櫃位付款後拎住2張紙仔，就係我哋今次的主角：電影票！婆婆話仲有10分鐘先入場，喺度企一陣先，於是我就企喺紅噹噹部機附近八卦，望住人哋企上去，入完錢就會有張卡仔跌出來，睇完兩次都唔知咩嘢玩法。到第三個人企上去，睇完張卡仔後，又擺番落個兜裡面然後離開了，於是乎我偷偷地行前兩步拎走咗佢張卡來玩(當時都唔知係乜，珍而重之咁拎咗返屋企保存，但經過無數次搬屋後已經唔見了)。就快入場前，我想問婆婆拎張票仔睇下，佢直接答我唔得，完全唔比好奇嘅我掂兩張票，理由係驚我整唔見無得入場……入場後，開頭那十分鐘我都有睇到畫面的，但在十分鐘後……我望的係"啡色手袋"，聽的係"發音"。手袋-----係我婆婆當天的行裝。佢拎起手袋在我的視線水平前屏蔽了。發聲-----因為畫面的主角並沒有太多對白，只是有叫喊及呼吸的"發音"。我問婆婆，做咩唔比我睇呀？佢：呢段你唔睇得呀。我：咁我無得睇咪唔明囉？佢：一陣睇得我比你睇。我：(可愛嘅我完全唔明有咩問題)好呀，睇得你就放低袋。跟住，平均每5分鐘婆婆的包包就會出現，每次屏蔽5-10分鐘，結果我中途太悶訓著咗了。其實我已忘記最後有無睇晒套戲，定係中途走了，總之到最尾，我好記得出到門口後，我好乖咁幫婆婆拎住個戰利品嘅膠袋，佢自顧自地在手臂推拿咗兩下，悄悄咁講咗一句：慘過行街，搞到手都酸了。係！無錯、無錯、無錯！那套，係三級片！婆婆屏蔽嘅，係兒童不宜的畫面！事實係：其實因為婆婆唔識字，當時佢係亂咁揀的。就係咁，喺婆婆知我攰想我抖的大前題下，人生第一次入戲院，人生最難忘的一套戲，就係睇咗一套唔知叫乜名的三級片。🤣🤣🤣**歡迎加Facebook或Instagram支持下隻港豬！！Facebook(小豬批雜貨)：https://www.facebook.com/PigPieSmallStore/Instagram(港豬無聊事)：https://www.instagram.com/pigpig.carcar/
