(首先，唔好比相中隻招財貓呃咗，我今次唔係想提日本哦~~~~~只係以下個主角令我諗起名古屋隻貓，所以借咗佢個貓頭來襯托一下)韓國嘅衣食住行唔係我杯茶，所以對我來講唔再去韓國並非損失。不過最記得的景點，正正就在韓國。當時係家庭旅行，一共7粒人出發。因為驚婆婆攰同埋怕自由行唔啱佢玩，於是全家人一齊跟團去韓國。當年完全未去過，諗住乜都可以買一餐，於是直接跟咗團費超抵嘅購物團。記得有日早上的其中一個行程，係全車團友一齊去『人參店』，我當時一心諗住：咁熱可以嘆冷氣都不錯~但後來回想，好明顯婆婆入店前，就已經認同咗自己係購物團團友嘅狀態囉……由入店起，講解專員就邊行邊講，介紹起源地、功效、冷知識等，導遊同領隊當然一齊助攻講埋一份啦~佢哋越講婆婆就跟車越貼，後來仲掉低我老媽，直接同身邊的老團友及店員研究人參……(首先你要知道，佢聲稱係『無嘢要買』，『佢係唔會因為人哋講兩句就比錢架』)。跟住聽完講解後，佢已經心意已決，一邊左揀右揀，一邊左望右望，好似招財貓咁向我哋招手：我要買人參！佢覺得有啲貴唔多捨得，又唔知買邊隻好，咁我哋話送比佢當禮物啦，點知---佢：我自己有錢呀，唔使驚我無錢買喎。我：話說你點解有錢呢？(佢好似無叫我唱錢喎)佢：我一直都有自己錢呀，我都有帶來呀。我：你帶咗來？你…係咪講緊港幣？佢：緊係啦，邊有呢度啲錢喎？我又無你哋啲卡。我：……婆婆，呢度韓國喎，唔係用港幣架。佢：我知呀，都未講完，所以比個機會你哋用那個卡，你哋成日話用卡有分呀，對吧？咁就啱啦，你用那個卡幫我比錢，然後我比港幣你咪得囉。我：……喂，點係呀？咁我咪好著數？佢：緊係啦，你哋唔買野無分，我比分你哋啦。我：……好，簽名啫，唔該晒你喎送積分比我！結果，呢團嘅團友非常給導遊面子，人人嘅懷抱中都多咗一堆人參寶寶。雖然婆婆見到戰利品係騎騎笑，但在摷港幣比我時又有點不捨咁皺眉~~~佢啲神態，真係完美咁演繹出女人購物時嘅心情：不論甚麼年紀，只要係女人都會有想買嘅嘢，買甚麼不是重點，而係你覺得買咗會好開心，但喺想好開心買同唔想比咁多錢之間，又有自相矛盾嘅情感，會掙扎買好定唔買好……當日，我睇住婆婆將想購物嘅意欲同心境，配合埋比積分我嘅預謀，將全場獨腳戲發揮到淋漓盡致囉！我阿婆竟然成功將人參店成為我難忘的景點，恭喜你呀~最佳女主角，你得咗啦~🤣🤣🤣🤣🤣**歡迎加Facebook或Instagram支持下隻港豬！！Facebook(小豬批雜貨)：https://www.facebook.com/PigPieSmallStore/Instagram(港豬無聊事)：https://www.instagram.com/pigpig.carcar/
