話說，自從早幾年去完芬蘭的聖誕老人村寄名信片、 緊接住去挪威營地感受咗1個全黑嘅晚上後， 因為日光太短個人好灰，仲要11日旅程最終見唔到極光......跟住無再去遠程遊了。 呢幾年全部都係短程遊：日本、台灣、吉隆坡、布吉， 但去得最多係日本同台灣，吉隆波同布吉好似唔係咁啱FEEL，唔係我杯茶。 好多人旅行都會順便掃當地名牌貨，自用或送禮都抵啲。不過窮人嘅彈藥不足，所以一向對名牌無乜需求。在日本時：係掃100YEN店+狂食、在台灣時：係掃街喪食+街邊SHOPPING。< 日本 > 因為唔使要求市區、大商場、名牌街，100YEN店其實四處都有，所以PLAN親日本遊都唔使煩，可以去幾偏就去幾偏。當然，首要條件係團友中要有免費司機，咁你先可以咁任性，HAHAHA！如果第1次自駕遊的話，要記得留意下：住宿附近有無便利店及小店可以逛下。話說我哋班人夜晚最常跌錢嘅地方，係日本的便利店：冷麵有好多餸、炸雞永遠都脆卜卜、熱狗永遠真係HOT的，完全唔HEA。試過有次訂間民宿好靚，住宿係包餐的，預訂時講咗晚飯係好早吃，結果泊車+拎房+食晚飯，完成都未夠19:00，食到好飽後，諗住行出去睇下，但當時天已全黑，街燈少到唔多睇到路，在沿途都有狗吠聲嘅情況下，行左2條街先發現方圓十里都無便利店或小店，結果那晚在酒店玩溫泉、睇日文電視、玩手指FING腳指、坐到11點已經好想食嘢......所以，如果得的話，住宿附近有幾間小店+便利店係最理想的。住得偏遠無問題，因為沿途係車行，行錯了只係浪費油錢；但偏遠地區本身路窄，而一到天黑，條路根本沒多少街燈。如果太早完成行程，可能會因為天黑路窄未必再出去，即係連想食宵夜或買雪糕嘅機會都無。我當時身在其中只係諗起：如果而家有間便利店，比我買罐啤酒同冷麵慶祝下今日初到貴境，係幾咁幸福的一件事~~~**歡迎加Facebook或Instagram支持下隻港豬！！Facebook(小豬批雜貨)：https://www.facebook.com/PigPieSmallStore/Instagram(港豬無聊事)：https://www.instagram.com/pigpig.carcar/
