有次，決定同5粒HEA遊嘅人去名古屋，加埋我自己，即係6人HEA遊團。 自由行，多數都係推比我同阿妹兩人去PLAN行程， 咁準備之前就問佢哋：想要咩景點？而家唔講到時就跟住行架啦。 A：我想試下喺日本釣魚。 B：我想買釣魚啲野呀，人哋話平D。 C：我要幫屋企人買動漫手信。 D：我只係唔想行程咁趕，最緊要食食食，呀，我要食<世界之山>。 我：我未去過那邊喎，去望下啲廟同大阪有咩唔同。 妹：我要溫泉。 就係咁，可以PLAN行程了 (其實，都差唔多成形啦，HAHAHA)。 咁PLAN好之後，其實多數都要拎出來傾下，好似開茶會咁， 好彩，我哋多數都係收工飯局時順便講，唔使專登約。 飛之前的兩個月，其實都PLAN得7788了， 有次食飯時，見有其他非團友一齊食，為免人哋搭唔到訕， 咁諗住將個流程講幾句就算啦。 我同A講：為咗比你由南油釣到去日本，我決定坐船仔比你去<篠島>釣魚。 我同B講：到時揸車，附近有漁具買，你記得帶夠錢去博一博。 我同C講：已經為你準備咗動漫街啦~ 我同D講：搵到<世界の山>雞翼店啦，到時雞翼宵夜+煙民+生啤，放心。 然後我話：今年唔去淺草，好彩無買那個御守，否則唔知幾時先可以回收~ 跟住，第1個發問的，唔係A-D朋友，係另外的W-Z朋友--- W朋友問：你哋去釣魚呀？咁咪要帶好多野囉？好重喎~ X朋友問：漁具平好多架咩？我去東京唔差好遠咋喎--- Y朋友問：動漫街唔係在大市區架咩？你去那邊咁靜都有？ Z朋友問：乜神社啲符要回收架咩？要拎返去架？ 於是，我用自己僅存知道的資料回答咗佢哋--- 1.有人係會JOIN日本釣魚團去釣魚的，基本上那團人的時間都係在海裡， 可能會轉好幾個位置，而且多數對魚穫有要求，通常都係會帶私人漁具； 而今次我哋係直接由師崎港坐船仔去篠島釣魚+睇下景， 主要係滿足下佢哋能夠釣到日本海的魚嘅感覺， 即係要求唔高，所以唔使拎漁具的，去到比錢租用就可以了~ 去篠島要坐船仔，去釣魚啦~ 2.以自己所見及班釣魚人所提供嘅評論： 其實日本漁具的原價，唔係比香港平， 但係，只要佢一做特價，而剛巧係你想要的，你拎上手都會笑到四萬咁~ 因為佢特價的貨，多數比香港平，更甚的係佢分分鐘可以平3份1或半價！ <日本漁具平定貴，在乎運數與舖排！> 舖排：如果只為飛去釣魚店買平野，你只要留意心水店的特價時期， 留意今次特價有無你想要嘅嘢，到時一飛到去就可以買餐飽了。 運數：我哋呢類人，一來多數係想去睇下有乜平就買，唔係有特定嘢想買； 二來多數係因為去日本旅行而*順便*買。 呢個情況，只能當天去到舖頭，睇下有無運數見到你心水貨做緊特價了~ (我哋那次係有運的，HAHAHA) 3.只要提動漫街，多數第一時間會諗起秋葉原或日本橋， 我本身唔係動漫迷，真係沒留意名古屋都有條咁嘅街，在大須~ 條街有唔少店鋪，勁多動漫產物，感覺無秋葉原咁鬧市區，但其實幾好逛--- 係，必需要用*逛*字！ 因為喺香港市中心行街想逛得free係妄想，所以感覺更深。 當日想搵隻Figure，於是每間店都入去望兩眼， 街外條路唔迫，店入面唔拘束又多舊野睇，應該行咗8間10間吧。 我哋當日在隔離街食完早餐後直接入街，結果完成後個肚就要求放飯了... 2018年的事了~唔知佢哋3劍俠仲喺唔喺度呢？ 4.神社有好多款平安符/護身符，有啲其實係回收咗會好啲架~ 呢樣嘢係以前聽韓國老闆娘講的，佢嫁了個日本老公， 以前傾偈時，佢多數唔係講韓國，係講住日本時的事， 話家庭主婦圈告訴她，神社買的*御守*符，多數用1年就拎番去回收。 同你地香港人去借庫一樣，用完要還回去，再請過先好架喎。 咁我當年聽完已經入左腦，盡量去親都只買吊飾，唔買有*御守*兩字的， 雖然有d寫住*御守*的可能不是護身符是純裝飾，但我唔係好識分！ 基於寧可信其有，我都無買過呢類寫住*御守*的物件~ 天朗氣清!!我的感覺係...入去企一陣都好似洗乾淨晒個人咁~~~ 因為那次嘅飯局，我越來越覺得同其他人傾下旅行嘢係好事。 原來有時你估計人哋應該知道的事，實際上，佢其實真係唔知的~ 可能講講下，佢先發現無預計呢樣嘢，跟住講句：係喎，好彩你提我！ 即時覺得自己原來仲有點兒用處嘅，哈哈哈~ 所以呢~傾偈有益又嘻哈，唔好掛住玩電話！！
