南紀白浜位於和歌山縣嘅西南面，係日本一大好受歡迎嘅溫泉區，當中 Toretore Market 更係好多遊客都會去嘅魚市場。Toretore Village 就正正喺 Toretore Market 對面嘅小山丘上面，整個渡假村佈滿左一間間粉黃色圓頂獨立小屋，感覺就好似去左外星人基地一樣，感覺非常特別﹗ 編 排行程嘅時候無意中發現左 Toretore Village，本來以為佢設計咁特別，一定好貴，點知發現佢比其他白浜嘅溫泉酒店更便宜﹗Toretore Village 提供洋室及和室兩種房形，洋室可供 1 至 4 人入住，而和室就最多可以住 6 人。選住左和室，一泊朝食每人只係 ¥7,200，五百蚊港幣都唔洗，仲可以免費使用對面嘅 「Tore Tore之湯」溫泉樂園。 揸車上到去，已經見到一座好奇怪嘅大型建築，原來係小賣店同埋 reception，旁邊亦有大型免費駐車場。 Reception正面同內裡設計簡約時尚，巨型玻璃窗設計令住客 check-in 時已經可以清楚望住外星小屋村落，真係想即刻衝出去睇下﹗ Toretore Village 內有 72 座獨立小屋，佔地非常大，四周圍綠草如茵，加上藍藍天空，好似去左一個外星角度，未受污染嘅世界咁﹗ 由正門入口行，彷彿走入左外星小鎮，根住房號搵番自己嘅基地，感覺又寧靜又舒服﹗ 點擊圖片放大 打開大門，選擇入住嘅和室非常簡約，房中央放置左一張茶几，而榻榻米同埋床舖亦整齊地放左喺櫃入面，榻榻米溫暖又柔軟，好舒服。 浴室設備一應俱全，浴缸同淋浴間都有，更會準備好唔同顏色嘅牙刷，非常細心﹗ 點擊圖片放大 每間小屋嘅屋頂中間都會有個魚眼小天窗，夜晚如果天氣好，就可以攤喺度睇到星星夜空，非常浪漫！ Check-in 嘅時候，職員會準備好朝食劵同入浴劵，特別要留意番浸溫泉嘅時間。 食早餐嘅地方係喺上 Toretore Village 嘅小路上，食物選擇種類唔多，不過都無問題。因為對面馬路就係 Toretore Market，咁多魚生等住你，早餐又洗咩食咁飽﹗ 點擊圖片放大 幾百蚊港幣就可以享受到一晚與別不同嘅體驗，實在值得推薦﹗ 原文：http://heatravel.blogspot.hk/2014/11/toretore-village-japan.html 請支持，用心分享，Facebook：https://www.facebook.com/heatravelling
