多年前因為經常係荃灣出沒，路經沙咀道一間叫"雲家小鍋米線"嘅小店後，真係食過返尋味！ 今年雲家於元朗開新店，作為米線愛好者，睇到Facebook米線關注群組分享後，都抽咗半日時間走入元朗覓食。 一如往常，為咗試真d睇下新店可否保持荃灣店嘅水準，我都係選擇食「小鍋米線」，配上螺旋草、豬扒、豆卜三樣配菜，上枱後同樣比大份量 滿滿嘅一碗米線嚇到。 見到menu上有螺旋草時 覺得幾特別而想試下，食起嚟同米線非常夾，比紫菜更有口感，各位食肉獸都可以試下！ 豬扒亦都香口惹味，分量亦唔係單單一兩塊就算，可見店家嘅老實用心，用餐時間都抵佢大排長龍。 另外，同行朋友亦都叫咗多樣小食，包括小店招牌涼拌墨魚頭，墨魚頭鋪滿蔥蒜配上特色酸汁，食落亦新鮮爽嫩！ 另外手拍青瓜亦有配上蒜蓉，建議想食小食嘅朋友可以叫少一個米線配料，配搭青瓜同蒜蓉，一口米線一口青瓜，感覺更好味！ 炸雞中翼亦係醃過好入味，不過因為叫太多，我食咗一隻，就放棄了比友人清枱！ 總括嚟講，我覺得新店水準比荃灣店更升級，單係小食 涼拌墨魚頭，同埋米線關注組都狂推嘅巨量「小鍋米線」，已經值得係入元朗嘅時候試吓！ 雲家小鍋米線 元朗分店元朗馬田路20-30B號安寧大廈地下2號舖聯絡電話：2383 8682營業時間︰星期一至日（星期二休息）: 11:30-21:00 facebook : https://www.facebook.com/pandaqqhk想聯絡我可以電郵到:aringlife@gmail.com
