粵語【我杯茶】意思係-- 喜好；正中下懷；鍾愛的事物；恰好符合自己的口味。英文就有 "My cup of tea "。係維多利亞時代飲茶風氣盛行，啲人甚至乎早餐飲茶來代替咖啡。有錢人家嘅gathering 就係要黎個afternoon tea~ (唔係High tea 啊。High tea 係窮人黃昏食嗰餐,又名Supper ，姐係啲家常便飯。) 但系每個人對茶嘅要求都唔同，有人中意濃啲，有人中意淡啲，有人中意落糖，有啲又中意落檸檬。眾口難調，所以就出現咗" It's not my cup of tea " 啦。 講翻正題啦，最近係社交平台睇到個訪問，就係訪問奶茶王主理，係灣仔新開嗰間"我杯茶"。 佢地賣嘅有主打嘅港式奶茶、鴛鴦、咖啡同檸茶。食嘅得light meal ; 有沙爹牛肉蛋治、菠蘿油同幾款三文治等。成個setting 都好簡單，裡面地方淺窄得唔夠十個位，所以好多人都係外賣或者係門口立食。 奶茶喎! My favorite ! 梗係第一時間去試試。好飲嘅奶茶梗係要水滾茶靚，Full bodied，夠滑同埋各方面嘅味道都要有個平衡。 奶茶王真系不停咁企喺度冲奶茶咖啡伽! 真係好有Heart，完全感受到佢嘅誠意~ 今日我就梗係買奶茶黎試，再加多一個菠蘿油同沙爹牛蛋治。 首先講個奶茶，真系夠"滾"夠熱(入口嗰下個溫度好重要伽)，個茶膽就用咗幾種茶葉，好夠茶香，唔會太過澀，奶嘅比例就略爲高咗啲啲。不過overall，係我杯茶! 跟住個菠蘿油我都好推介。平時多數啲菠蘿包一咬個皮就全部甩晒落黎，佢就唔會甩晒出黎，個包都烘得夠脆夠香，包個texture又夠乾身，唔會搞到個菠蘿油一pat pat，油包分明，咬落去會有幾種層次，確實難得! 最後就係佢地嘅沙爹牛肉蛋治， 我都係會推介嘅。沙爹裡面加咗少少沙茶醬好香，啲牛肉加埋蛋炒得都好滑，同埋最重要啲牛肉無"喇"到散晒，保持到有'咬口'又唔會太"鞋"。整體係非常不錯嘅~ 有時間真系要試試佢啊~ 要揾啱你杯茶，真系要周圍去試下啲好野嘅~
