上一篇：自駕遊的迷思 話說，因為一張據稱為全世界售價最貴嘅相，我地決定要親身去美國西岸嘅羚羊峽谷一趟﹗係網上預約左連續三日嘅上、下羚羊峽谷觀光或攝影團，然後見到CX直飛洛杉磯嘅機票唔使4千蚊港紙，於是舊年12月訂完機票就開始計劃行程﹗﹗本來想去埋同羚羊峽谷同屬阿里桑那州嘅THE WAVE，可惜THE WAVE每日只限20人，舊年(2018)12月抽今年5月嘅入場配額都無緣，真係難過登天﹗﹗ 好彩嘅係，美國西岸真係好多奇山異石，即使唔去THE WAVE，都依然仲有好多地方可以去﹗﹗於是，行程就是這樣發生了﹗﹗ 第一站 - Las Vegas (May 25 - May 27, 2019) 美國時間比香港慢，縱然機程要12個鐘，25號中午係香港出發，係LA落機都依然係5月25，不過真係諗都無諗到，5月尾嘅洛杉磯，正午12點都仲係得十幾度，去機場附近嘅租車公司租完車，就向LAS VEGAS出發，中途完全唔休息都要差不多5個鐘。逗留兩晚，除左係市內四圍行下，睇下噴泉，最主要係去左附近一個叫RED ROCK CANYON嘅地方﹗ 離市區半小時車程就可到達嘅RED ROCK CANYON NATIONAL PARK 第二站 - GRAND CANYON (SOUTH RIM) (May 27 - May 29, 2019) 離開LAS VEGAS就向大峽谷出發，諗返起好好笑，真心大鄉里，細個個陣一直以為，大峽谷，顧名思義，應該係一個大嘅山谷囉﹗﹗到大大下先知，原來大峽谷係講緊一個接近五千平方公里嘅地區（香港九龍新界加埋離島大概有2千7百平方公里），而唔係指單一一個山谷﹗﹗依據地理，大峽谷可分南緣北緣，全部高度都超過海拔2千，本來以為5月尾6月應該會開始熱，點知去到南緣逗留兩晚，出左日頭都只係得十幾度，半夜出去影星就更加係零下嘅溫度，搞到要將所有嘅衣物披哂上身保暖﹗﹗ 南緣大峽谷內其中一個觀光點嘅日出 南緣大峽谷內MATHER POINT影嘅MIKLY WAY 第三站 - PAGE (May 29 - May 31, 2019) PAGE可以話係今次旅行嘅重點城市，ANTELOPE CANYON（羚羊峽谷）同HORSESHOE BEND（馬蹄灣）都係哩度，我地分別報左一日下羚羊峽谷嘅觀光團同兩日上羚羊峽谷嘅攝影團，攝影團費用當然會比較貴，但就唔會被趕鴨仔，可以慢慢影，睇個人喜好﹗﹗去PAGE有一件事要留意，就係時間。 因為地區問題，即使手機已更新網絡時間都有機會出錯 GRAND CANYON同PAGE都同屬ARIZONA，明明該係同一時區，但我地由GRAND CANYON去PAGE途中，車上面嘅時鐘突然自動校快左一個鐘，到底點解﹖﹖先賣個關子，稍後解釋﹗總之假如準備去PAGE，記住搞清楚出發地同PAGE嘅時間，千萬唔好信網絡嘅自動同步時間，免生誤會﹗﹗ 上羚羊峽谷的經典光束 羚羊峽谷，除左光束讓人著迷，土質帶紫也引人入勝 PAGE的另一個景點 - 馬蹄灣 第四站 - MONUMENT VALLEY (MAY 31 - JUN 1, 2019) 美國西岸本身已經好多原住民，好似羚羊峽谷，都一定要跟隨由原住民主辦嘅旅行社先可以進入，而MONUMENT VALLEY就更加係一個由原住民管理嘅保育範圍，美國國家公園嘅年票完全唔適用，要另行買票入場。哩度唔算係一個熱門景點，至於點解要嚟﹖假如有睇過FORREST GUMP，應該會記得，佢跑左3年幾，突然停下腳步話要回家，佢停低個個條公路，個個背景，就係MONUMENT VALLEY啦﹗﹗ MONUMENT VALLEY FORREST GUMP停止長跑的地方 MONUMENT VALLEY的星空 第五站 - BLANDING (JUN 1 - JUN 2, 2019) 假如話MONUMENT VALLEY唔係熱門景點，咁BLANDING就好肯定係冷門添，一個好細好細嘅小鎮，而我地係處留宿一晚，只係為左方便開車去一小時車程嘅國家公園NATURE BRIDGES NATIONAL MONUMENT。哩度有幾條全世界最大，天然而成嘅石橋，被國際陰天協會（IDA）選為無光害嘅景點之一，我地大部份嘅行程基本都係根據IDA的暗天城市或景點而行（有機會再講） 天然橋公園內其中一條橋 行大概半個小時就可行到Owachomo Bridge嘅橋底 Owachomo Bridge的星空 第六站 - MOAB (JUN 2 - JUN 4, 2019) MOAB算係大鎮，皆因附近有好幾個大景點，好似CASTLE VALLEY, ARCHES NATIONAL PARK，同埋CANYONLANDS NATIONAL PARK。 大概亦因為係大鎮，所以網絡接收比較好，其實由離開LAS VEGAS之後，電話咭基本唔係好收到，一直都只係靠事先DOWNLOAD嘅OFFLINE MAP同車上內置嘅GPS搵路（車上有內置WIFI，但我地無另外比錢租），入到MOAB總算重回人間。 Mesa Arch, Canyonlands National Park North Window Arch, Arches National Park Delicate Arch, Arches National Park 第七站 - CAINEVILLE (JUN 4 - JUN 6, 2019） CAINEVILLE係屬於一個叫TORREY嘅小鎮，離LAS VEGAS差不多有個鐘車程，亦係被IDA選為暗天社區嘅地方，本來，我地只係度留一晚，只係想去附近嘅CAPITOL REEF NATIONAL PARK睇下，然後就過去BRYCE先再返LAS VEGAS，點知係5號個朝出左事，架車係一條DIRT ROAD壞左，幾經辛苦要遇到好心人車我地返出大路搵救援，但一等，就等左24小時，結果就係要放棄BRYCE嘅行程同酒店，等拖車嚟拖我地架車返LAS VEGAS。 CAPITOL REEF 離旅館一分鐘車程嘅地方，就可以見到咁靚嘅銀河啦﹗﹗ 尾站 - LAS VEGAS 到 LOS ANGELES到香港(JUN 6 - JUN 9, 2019) 因為壞車，被迫係CAINEVILLE滯留左超過24小時，等拖車連人帶車，開左6個鐘車我地返去LAS VEGAS（租車公司全數賠返滯留期間嘅相關費用比我地），係半路中途仲要爆呔，好彩只係爆內呔，司機叔叔唔想耽誤我地時間，情願開慢啲都想即時車我地返去LAS VEGAS，返到去租車公司換埋車，搞到成半夜十二點先去到預訂嘅酒店，雖然過左漫長嘅一日，但總算有點安慰，就係酒店話已經無哂房，UPGRADE我地去左間有超大露台嘅套房，唔使加錢就得到一個靚景，都算唔錯吖﹗﹗訓醒，施施然開車返去LOS ANGELES，係機場附近嘅酒店留多一晚，就回程返香港。 因為遲CHECKIN，得到免費升級去靚景套房 返到LA，只係隨意係機場附近嘅酒店留宿，同食左餐漢堡包
