個個排隊買奶蓋，到底係咪個個都識飲奶蓋 繼續頭痛，痛到一整天都無法離開張床，無無聊聊，終於睇左早排個個都讚嘅李屍朝鮮，的確好緊湊。好佩服韓國嘅編劇，佢地咩題材都敢寫，而且大都文學水平高，唔似大台啲胡鬧劇。 其實由細到大都唔鍾意睇香港劇集，故事結構太平舖直敘，十居其九一早就可以估到故事舖排，但日/韓劇就咩題材都敢寫，日劇節奏又嫌太慢，而且一般比較灰，比較沈重，反而較鍾意韓劇輕輕鬆鬆，又夠爽快。始終唔同國家，唔同地區，對於編劇嘅文學修養水平要求各有不同，最緊要係觀眾有共鳴，師奶劇同樣有觀眾，同樣有擁躉，沒有高低之說，自己鍾意就得。 好似最近有朋友埋怨，話走飲管措施係擾民，問話如果無飲管佢點飲奶蓋。你唔係飲珍珠奶茶喎，你只係飲奶蓋，要飲管做咩？ 梗係要飲管啦，無飲管點飲？ 咁得意？到底你理唔理解奶蓋嘅精髓係邊度？梗係要對口飲，等每一啖都可以品嚐到茶同奶蓋自然混合，你用飲管，飲到茶底又飲唔到奶蓋，咪哂左杯飲品囉。OMG，不過，都係個句啦，每個人都有自己選擇，最緊要係傳飲個個開心就得啦﹗
