旺過旺角嘅山頂 話咁快又放完幾日假，一般人初一初二都要忙於家庭聚會，到初三稍稍得閒啲又想見下朋友，雖然長輩話初三係赤口，但個人覺得，初三其實係朋友日。 自己唔使拜年，但身邊朋友要，所以都要乖乖等到朋友日先可聚頭。 今朝晨咁早（8點）係元朗先同識左廿幾年嘅老友及其父飲茶，然後又同另一個朋友一家大細係尖沙咀食個晏，跟住就直奔山頂行左團，真係倦到虛脫。 話說好友係山頂工作，過年時候當然無假放，為求見好友一面，於是諗住殺上山頂派利是，點知去到IFC小巴站見到排長龍，仲聽聞經已等左個幾鐘。 聽聞等左個幾鐘都未有車 好明顯係太倦，個腦轉唔切，居然只係以為假期多人上山頂，小巴服務消化唔切，仲賴醒咁一行四人改搭的士。之但係簡單如我真係太天真，居然無諗過 - 塞車哩個議題。 係中環交易廣場上左的士，真係無諗過會中伏。係，小巴排長龍係因為假期嘅遊人多，但背後嘅真正原因係上山頂條路大塞車，啲車返唔切。真係救命，仲以為4個人一齊搭的士可以分攤下，點知，行左陣就經已開唔到車。 司機叔叔話，保守估計要塞兩個鐘，過年時份，多國內旅客上山頂行大運，旅遊巴塞死哂啲路，搞到其他車都上唔到。每年初一至初七都係哩個情況，真係汗顏。塞車當然討厭，但更討厭係我地係的士上面，塞兩個鐘的話，車費。。。 司機叔叔見我地係度討論要唔要放棄，就問我地上山頂做咩，假如只係諗住行大運，建議我地放棄，但既然係探朋友，不妨去到白加道行上山，咁就唔使咁慘又要塞車，又要係咁跳錶。 好提議，反正我地未試過，又當新春行大運囉，順便睇下沿途風景，如是者，由交易廣場到白加道纜車站，大概花左1個鐘，最後收費係HKD111算是賺到了，假如再繼續塞都幾慘，好人有好報，我地一落就有另一批客上車，唔使吉車返落山。 雖然好多人都覺得大多的士司機無禮貌，慶幸我們遇上好人了。有時人同人都係講互動，大家有傾有講，身份都唔一定係對立。慶幸司機叔叔嘅好提議，行左段平時唔會行嘅路，感覺有趣。 後尾6點幾走，都等左個幾鐘巴士，過年原來真係唔好上山頂。
