有時，係食店想走塑減廢，未必受歡迎，特別係人流比較多既餐廳，落單同出菜既未必係同一人，忙到頭昏腦漲，要記得你句"走飲管吖唔該"，都唔係易事。 一句"走飲管吖唔該﹗"而打開的緣份 哩間餐廳大概半年前幫襯過一次，睇返相原來係舊年9月既事﹗對佢地既德國鹹豬手同白酒煮青口一直念念不忘，只係天水圍出沙田有點遠，難得入開大埔，當然要幫襯一下﹗﹗真係無諗過原來年初一商場都咁多人，可能大家都唔想係屋企煮吧﹗﹗大概等左半個鐘，店員安排入座，望左望餐牌，都係照舊點左豬手同青口（兩個人食得唔多，當然係食返鍾意食既），點完飲品，照舊加左句，走飲管吖唔該﹗ 點知，轉個頭女經理過嚟，好溫柔咁講左句：好耐無見﹗問心，確實有啲嚇親，唔係掛，我地只係半年前嚟過一次，又唔係幫襯得多，你係咪真係認得架﹖﹖女經理面露笑容，好肯定咁答：梗係認得啦﹗走飲管既客人唔多﹗﹗ 原來係咁﹗﹗的確，上次亦因為一句"走飲管吖唔該!"，女經理係有走過嚟傾左陣計，話第一次見有人用不鏽鋼飲管，然後閒聊胡扯左幾句，臨走仲送左張85折咭比我地﹗我地當然記得佢，只係無諗過，居然佢都記得哩兩個不怎起眼既客人﹗﹗ 當日有傾過，雖然好多客人唔鍾意，但佢地都情願用紙盒而唔用膠盒作外賣盒（雖然其實紙盒都有層膠，但總算是種態度﹗），真係完全無諗過，簡單既幾句說話，大家一直放在心上﹗﹗ 今次再幫襯，再相遇，食物質素依然保持水準，豬手好夠味但唔係死鹹個隻，最重要既係佢真係皮脆肉嫰（真心滑），個青口亦係上佳之作，爽脆鮮甜﹗期間有幫襯過荔枝角分店，但食物水準有差距，縱然係同一個食譜，但始終煮既人唔一樣，用既心思唔同，所以即管係一樣既食材，一樣既食譜，卻食不到一樣的味道﹗﹗ 第一次幫襯時經理送既折扣咭 好食到喊既白酒煮青口 堅皮脆肉嫰既豬手 同女經理由走塑傾到旅行，到餐廳管理，人生態度，由7:45分入座，好似傾到10:30，最後仲FREE左我地既飲品﹗可能有人會話，只係經營手法﹗兩個半年只係幫襯過兩次，唔飲酒，消費唔高既客人，仲要係走飲管既麻煩客，有必要嗎﹖不好說﹗只知難得投緣，無諗過，因為一句"走飲管吖唔該﹗"而結緣，走飲管快樂﹗﹗
