上一篇：港燦在廣州 / 港燦遊廣州 - 飲食篇（一） 以前工作關係，差不多個個星期都要上廣州，講緊係廿幾年前既事，由未有地鐵到第一條線開通，真係咸豐年前既事﹗﹗假如要問當年記憶，可以話係零，當年每日得幾班直通車，上到去有司機接送去酒店或寫字樓，要不就係施工現場，完全只係點對點運作，根本唔會自己一個人四圍行，所以記憶係零﹗﹗ 只知當年一定係住白天鵝賓館，因為同老闆同行，仲一定住22樓商務樓層，食早餐都係返個層食，連大堂都唔會流連。可惜當年相機無依家咁方便，完全無相片留念，確實有點空白﹗ 白天鵝賓館現貌 唔需要再上去做野，但所謂食在廣州，後來偶爾都會同朋友上去過個周末，四圍食下野咁﹗﹗唔知咩解，除左工作關係之外，其餘時間上廣州去都會搵APARTMENT住，講緊係十年前已經係咁，租個千幾二千呎既地方，一屋三房/四房，其中有兩間一定係客房，姐係有三個浴室連廁所，一班朋友一齊去玩，有私人空間之餘又可以聚埋一齊傾計，但收費都只係五百幾蚊一晚，真心抵﹗﹗ 酒店咭片 大廈正門 大廈正門 大廈附近的豪宅 房間夠闊落，感覺自在，仲有小露台，唔開冷氣都好通爽 房間內有樓梯上二樓 睡床係樓上，環境整潔乾淨 由睡房望返落客廳 洗手間連浴室，整體感覺都好好 有小廚房，有洗碗碟機，有電磁爐，但無爐具 廣州塔夜景 平時出入，就會行10分鐘左右去到猎德站（5號線），附近都好多野食，所以感覺良好，同隊友仲商量不如帶埋家中長老一齊行一轉廣州﹗講返住宿環境先，內地樓樓底高，所以房間內有小樓梯，入屋經過小走廊，廚房同廁所，就會到闊落既大廳，有開揚既露台，即使唔開冷氣都好清爽，睡房係樓梯上層，雙人床，四周圍環境都好乾淨企理﹗露台開場，雖然都見到對面樓，但未至於好似香港咁近距離，唔使擔心好似做咩都比人望到咁﹗﹗周末我有洗過衫晾出露台，唔使兩個鐘就乾哂﹗真心變態，老人家始終鍾意有日照哂衫，哈﹗﹗ 有小廚房，好有趣地，有電磁爐，有洗碗碟機，但無煲無鑊無餐具，唔知要來做咩﹗﹗拖鞋毛巾牙膏牙刷洗頭水護髮素充充都有，你敢唔敢用就另計﹗整體哩間住宅式公寓都感覺良好﹗呀，好無聊，因為經廣州圖書館去大劇院站會近啲，所以日日出入都會去圖書館玩一次，入完去，真心覺得自己係港燦。。。
