話說早幾個月發現屋企附近有間唔錯既日本餐廳，唔使山長水遠走出城，就有自己好鍾意既厚燒牛舌，於是差不多個個周末都會去食一轉。 之不過，由8月到依家，短短數月，居然有啲奇怪既改變﹗﹗利申，其實如果認真計個數，即使真係每個星期都去一次，都只係十一、二次，而中間又有去過旅行，所以應該係無咁多次既。 搵返啲相，原來第一次去係7月26，由最初去，見到周末晚飯時間會排長龍，到依家可以唔使等直入，去得多，店員當然會變得熟口熟面，雖未至於係熟客，但起碼會打個招呼，傾一兩句，但唔使三個月，店員就換左一半，哩個情況係上月初已經發現，最初都有八掛問下，其他人當然係話佢放左假（幾個一齊放﹖﹖），但當你一個星期後再去，依然未見相熟既身影就知發生咩事啦﹗﹗食店換人屢見不鮮，但剛開業咁快就換，而且一換就換走幾個都係好好禮貌，好醒目架既，就真係有啲耐人尋味﹗﹗ 依家去到，好經常都會見到老闆自己坐落檯同相熟既客人（或朋友）飲兩杯傾下計，但其他客人哩，都唔知應該點講好﹗﹗近幾次去到，客人唔多，每次都係直入，但每次都係落哂單，開聲提先會有人識幫你酙茶，要主動問，先會得到筷子，碟或其他用具，總之次次都要做奧客開聲問，感覺唔係好舒服，好似自己好麻煩咁﹗ 另外，店內本來有位好好禮貌既後生仔，估計係經理掛，一直都無問（我地兩個都唔係多口既人，平時對答都只限於：今晚啲野好食喎，唔該哂之類，一句起兩句止，所以唔知對方點稱呼，咩身份﹗），但好肯定佢係餐廳既酒牌持牌人 - 有相片既牌照需掛係當眼處，所以比錢時一定會望到﹗咁，做得酒牌持牌人，應該都有返咁上下職位掛，又，假如本身唔係信得過，唔係諗住佢會做得耐，你都唔會搵佢做持牌人啦﹗﹗需知道申請酒牌係好麻煩既事，而且申領需時，日本餐廳，好多時啲客都會叫清酒，假如無酒牌，都幾頭痛﹗有趣既係，最近哩個月連哩個有禮貌既男生都唔見埋，尋晚聽見有客人想叫酒飲，職員既回覆係，酒牌暫時仲申請緊，姐係，連哩個男仔都無做啦﹗﹗ 鍾意食哩度既文甲，覺得得別爽口清甜 至愛牛舌芯 海鮮丼好似唔係好新鮮 原來馬糞海膽要咁貴既咩﹖平時買開加拿大海膽都唔使咁貴架喎 尋晚食完，真心既，食物質素無變，味道依然抵讚（不過懷疑個海鮮丼既蝦唔係好新鮮，食完我地兩個返來都即瀉，而且係細菌個種腹瀉，食左一次喇叭牌就無野），只係，一間店舖，無論賣咩都好，服務態度都係一件好重要既事，到底點解係兩三個月內（仲要係新店）就走哂啲伙計哩﹖﹖有點莫名其妙﹗食客都只係局外人，平時都只同店員接觸多，從來都無同店主交談過，到底係邊個既問題哩﹖﹖真係唔識答。希望可以繼續維持水準啦﹗﹗ 相關閱讀：天水圍美食 / 食店續集（下）
