上一篇：荒失失奇兵（馬達加斯加） - 旅費準備 馬達加斯加西岸一棵有二千歲既猴面包樹 始終係野孩子，離開香港，無論係幾熱幾嚴峻既環境/天氣，依然可以精神奕奕，反而每次外遊之後返港，就會頭痛犯作，大病一場﹗﹗似乎我既香港不耐症越來越嚴重﹗﹗ 之前幾日大概講過出發前準備，所需旅費，好似都係仲未講行裝上實際有咩需要，行程係點﹗﹗不過講哩啲之前，想講下，其實心理準備都係一個好重要既調節﹗﹗話說，今次連埋我地兩個，共有十三個人一齊到訪馬達加斯加，而沿途所見，似乎有部份人仕好似唔係好知自己係邊咁，不停都有微言，相信佢地係出發前係完全無心理準備原來到訪地係咁既狀況，所以，真心覺得，心理調整係好重要既﹗﹗ 1) 語言 馬達加斯加曾經被法國統治過，大部份人除左講MALAGASY（當地語）之外，主要都係法文，識英文既人唔算多﹗﹗所以事先搵當地旅行社都係一個明智既選擇﹗﹗如果有興趣，可以預先學定一兩句（其實導遊教左我好多架，不過我估又未必用得著，所以唔寫了﹗）。我地所參加既旅行社導遊英文都好好，沿途既導賞員亦英文流利，但司機或酒店職員就未必﹗﹗拜託，雖然地方窮，或者大家英文都係有限公司，但溫柔既語氣，PLEASE, THANK YOU你都識講掛﹗﹗仲有既就係，其實大部份人都好老實，唔好成日覺得人地個個都係賊，粗聲粗氣咁去對人，唔好用呼呼喝喝既聲音去同人講野，唔該哂﹗﹗ ENGLISH MALAGASY HELLO SALAMA THANK YOU MISAOTRA GOODBYE VELOMA SORRY AZAFADY SLOWLY MORAMORA WAIT ANDRASO DANGER LOZA POLICE POLISY FOREIGNER VAZAHA GOOD TSARA BAD RATSY WATER RANO MEAL SAKAFO 2) 路況 由首都ANTANANAVIRO往東走去ANDAISBE，車程大概要4個鐘，沿途都係九曲十三彎既車路，假如會暈車請食定暈浪丸，還好沿途都係柏油路，所以叫做唔錯架啦﹗﹗由MORONDAVA繼續向西行全部都係黃泥路，路況好好好差，雖然坐四驅，我地五架車，得一架冷氣比較好，其餘的係弱冷氣，而我同導遊坐個架就係完全無冷氣，開住車窗其實都舒服，但就要忍受成身黃泥，正因無冷氣，本來同我一齊個位先生頂唔順過左第二架車坐，所以我得到全程獨霸導遊﹗﹗好多時都要坐4/5個鐘，半路亦有試過死火。 哩方面，真係拜託要帶著隨遇而安既心情，係咁差既路況，再好既車都真係唔玩得幾耐，何況佢地真係比較窮，一架車可能係四手、五手，都五勞七傷，當然你可以事先向旅行社要求要有好好既車（加錢），但我估對方都未必安排到﹗﹗沿途團友們都有點怨言，而我就樂得清靜，可以同當地導遊一架車，傾下計問下當地民生咁﹗﹗ 真係成架車則哂架 3) 電力 哩點係最令我想殺人既﹗﹗唔係因為電力不穩而想殺人，而係想殺左我個班埋怨既團友，稱得上全世界最窮既國家之一，電力不穩有幾咁奇哩﹗﹖第一晚係東岸ANDASIBE既國家公園附近住，入住獨立小屋，我地兩個一入到屋都未泥得切睇清楚周圍環境就已經全屋跳電，但因為當時已經係晚上十一點幾，而屋又分得好散，都懶得出去搵人，於是就開電筒照明就算﹗﹗ 佢無寫錯，你又無睇錯，真係只可以係下午6點至晚上10點前用指定電器 全程，只有最後一晚係首都個間酒店係有白光照明，其餘既入到屋都係昏昏黃黃，至於冷氣，係MORANDAVA既其中一間都有（遲啲講），其餘都無。因為大部份地區都只係靠太陽能供電，唔好企圖係房入面用電水煲或風筒，否則累街坊，唔係剩係你自己間房/屋停電，而係全體住客一齊停，所以拜託要有心理準備﹗﹗ 有遇過一到酒店，職員向團友表示，十點後屋內有照明，但唔可以用插蘇，即時就有人撲出泥質問職員，唔用插蘇點叉電，點用風筒之類之類，職員無可奈何就話你可到餐廳叉電，結果，就係再被追問，你係咪可以應付我地十三個人一齊出泥叉﹗﹗阿小姐，到底你知唔知自己係邊﹖人地話左你佑唔得，你係咪覺得你問完可以即刻舖電纜比你，定係即刻拎個太陽出泥比你咁﹖﹖ 當年出發到西藏，到南美，網絡上都有前輩提醒可能有部份地區電力不足，慶幸都無出現過，所以今次遇到一啲都唔意外，而其他人，唔知哩，唔用風筒係咪會死哩你話﹖﹗ 4) 治安 點講好哩﹖可能一直都一大班人，又同導遊一齊，所以治安一直感覺良好﹗有時食飯數錢數多左，店員都會如實退還﹗又，試過去超市，保安又提示團友小心外露既電話，小心扒手﹗﹗試過係村同小朋友玩，團友不慎跌左電話，小朋友都好老實執返比我地﹗﹗ 我地係首都地區坐車，導遊會提醒唔好伸手機出窗外拍照，以免被搶無得追。另外，夜晚無必要真係唔好單獨外出，特別係首都地區﹗﹗我有試過係西岸MORONDAVA附近既一個小村莊，一早走出去影日出，村民見到外來人拎住相機有好奇走過泥睇，但後來就有一斧頭少年靠近，示意問要錢，慶幸既係我真係無帶錢外出，佢亦無強人所難﹗﹗本來有諗過係猴面包樹大道影星空，但未出發旅行社已告知個區危險，入黑後不宜逗留。總之去邊度都係啦，盡可能唔好單獨行事，亦唔好財物露眼啦﹗﹗
