上一篇：荒失失奇兵（馬達加斯加） - 出發準備（二） 係馬達加斯加東岸一個養殖場見到既小狐猴，好可愛的說 講左咁多，咁到底馬達加斯加多唔多蚊既哩﹖咁就要先了解下馬地加斯加既基本資料﹗﹗整體泥講，每年既5月-10月，係馬達加斯加既旱季，全年最清爽，最舒服既日子，亦係旅遊旺季，其餘時間，姐係11月至第二年既4月，佢地就會不停落雨同變得炎熱，偶爾仲會出現鼠患。 我地係9月尾去，以我一個唔惹蚊既人，我到第四日就已經完全無搽防蚊防曬既用品，有無比蚊咬到哩﹖都有幾粒咬到，不過唔知咩解，咬完只係細細一粒紅印，而我其他團友，佢地一直都有做足防蚊措施，都一樣係有咬到，咬完仲好腫好痕下，咁囉﹗﹗蚊患同地區都有關係，馬達加斯加係一個狹長既島，被高山由中間劏開東西兩邊，中部係高地，會有梯田同水稻，東岸係熱帶雨林區，而西岸就係乾旱石林，我地只玩左東西兩岸，南北兩端係浮潛同賞鯨既好地方，只可惜我地只去八日，所以並未有到訪，途中遇見一對西班牙泥既年輕男女，逗留三個星期，基本就可環島一周﹗講返蚊先，中部首都ANTANANARIVO到東岸既ANDASIBE，天氣都較涼，日夜溫差大，我地到訪期間，早晚大概都只得十幾度，所以唔覺有蚊﹗反而過到西岸TSINGY，KIRINDY一帶就比較熱，中午時份可以接近40度，個邊就比較多蚊，團友大部份都係西岸時被咬到，同埋會紅腫痕癢，到底做唔做防蚊，就自己諗過啦﹗﹗ 地圖中紅色係馬達加斯加既首都位置，我地只係去過有星星標注既地方 4) 講左入境，不如講埋出境，講完先講換錢同食物吧﹗﹗話說入境時，只係見到朋友被關員示意攞錢，最後大家都幸保不失，咁離境哩﹖離境就要注意啦﹗﹗ 離境都依然會係返同一個機場，不過就一入門口就係禁區，導遊去到門口就已經走左。第一關係X光機，會突然有一班著黃色反光背心既人唔知係邊樹走泥拎你件行履，拎上運輸帶過X光機，佢地唔係關員，唔係工作人員，幫你拎完佢係會問你收小費既，假如你個篋好重，想人幫手又唔介意比幾蚊港紙佢地既，你就隨得佢地啦，不過原則上你可以唔使理佢地。 行履過完X光機，係你企圖拎返行履之際，或者會有關員問你係邊度人，去邊度，記住記住答HK，不過依然會有唔老實既關員夾硬拎住你本PASSPORT然後示意叫你行前將行履箱打開，我地就係係哩樹中左伏（有朋友係完全跳過哩個過程），佢地會要求你將行履箱內既野逐件打開，睇下有無野可以為難你，我一向都唔買手信，所以佢地無咩可以問。跟住佢就夾左男士入房，兩個人，其中一個手持打開左既界刀，搜左輪身，關員直接開口問，有無現錢，發現當事人一個仙都無既時候先比佢返出泥﹗﹗而係外邊比人搜緊行履既我，同樣被問到有無外幣，好好彩，我有兩個銀包，一個的確有數百歐元，而另一個，就只放左當天剛將當地幣換回歐元既150，我只將有150歐既銀包拎出，佢地見得咁少，無咩興趣就打發左我地走﹗﹗而我地另外既朋友，就因為有袋住大量現金而比人拎左100美元。 溫馨提示： A) 我地搭過兩次內陸機，兩次都會被要求打開行履箱逐件搜查，臨走亦遇到同樣情況。內陸機要逐件搜係因為無X光機，而且佢地怕旅客偷運，偷運陸龜，偷運雲妮拿，同埋偷運花梨木，兩程內陸機遇到既關員表現都友善，無特別留難，只係臨走係國際機場時被問攞錢，我地13個人，有一半都遇到類近情況，但只有一個因財物太露眼所以才有點損失，記緊自己小心放好就可以了﹗﹗再講一次，整體既馬達加斯加人都友善，只係有關員以權謀私。 木雕既猴面包樹 B) 木雕係其中一個好經常會見到既手信，不過記住唔可以放手提行履，買完要放寄倉行履。因為有人會偷運花梨木，假如木雕太大件，一定要準備單據（一般係市集見到細細個既都唔會被留難，放心），要不有機會比借口關員留難而向你收錢。 C) 過完X光機先會到航空公司辦理登記，到時關員一定會要你出示航班資料（其實過X光機之前都會有人問），所以記緊一定要打印機票資料隨行。 D) 辦理完登機手續，就會過PASSPORT CHECK辦理離境，要再填一份細細既表，太混亂無影到相，都係基本資料，但會問最後住個間酒店既地址，一樣，寫酒店名就可以了﹗﹗ E) 最後，入左登機大堂後，去廁所依然有機會會比人問攞錢，你去完返出泥，會有個阿姐示意要錢，因為已事先有朋友報料，所以我咩袋都無帶落去，當阿姐示意要錢時，我表示咩都無，佢都就咁比我走﹗﹗ 總結，雖則出、入境都有遇到不老實關員，但係公開地方，你唔比佢地又唔會對你點﹗至於被夾入房就另計，所以都係無必要唔好袋咁多現金，同埋錢要分開放﹗唔係馬達加斯加人貪心，哩個只係每個發展中國家，有人以權謀私既特質，並唔係個個都係咁，希望唔好破壞你對哩個地方既印象，係度分享，只係希望準備起行既朋友多加留意咁姐﹗﹗ 至於洗費同飲食，聽日再講﹗﹗
