酒店旁的歷史建築物 話說今年8月31至9月4去左轉曼谷，返來一路都懶無寫過任何關於今次既曼谷之旅，既然尋日講開係曼谷食單骨雞翼，不如又搵啲野講下吖﹗﹗ 雖然去左曼谷十幾次，但之前住來住去都係個幾間酒店，無他既，皆因個人實在太懶，唔想花時間搵酒店搵資料，不過今次同朋友去，佢唔想住重複既地方，咁，唯有又搵下第二間啦﹗﹗ 老老實實，去曼谷要住新酒店的確好多選擇，年年都有新酒店開，之不過，假如要靚，要地點便捷，仲要抵住，就真係要做下功課﹗﹗如果無記錯，我地係8月初開始搵，以為9月過哂暑假期，應該無咁貴啦掛，但搵來搵去，似樣啲又方便既5日4夜酒店連機票，全部都起碼要5千幾，仲唔係間間新酒店都有泳池，真係好鬼多要求﹗﹗如是者左搵右搵左幾日，最後搵到間都算係名牌酒店連CX機票，一個人4千3（連稅），酒店唔係新開，睇返資料好似開幕日期係2012年既12月，姐係都有6年，但大品牌酒店，應該KEEP到掛，又即管試下﹗﹗ 酒店所在地係BTS CHONG NONSI站，由機場搭機場線SRTET CITY LINE去到PHAYA THAI，再轉BTS去CHONG NONSI（中間要係SIAM轉一次車），全程連換車大概係45分鐘，收費係77BAHT - 45 BAHT機場線加32 BAHT BTS，姐係大概18蚊港紙﹗ 由機場搭到去CHONG NONSI，大概45分鐘（地圖唔係新既既，幾條線都延長左） 最初當朋友知道由機場去酒店要轉兩次車，係有少少微言既，皆因佢自己去的話比較鍾意坐的士，但我地反而就無必要唔想搭的士﹗點解﹖﹖其實曼谷的士好平，可惜佢地既的士司機唔鍾意睇咪錶，而要講價﹗即使講完價都仲係比香港平，但我地就係硬頸，覺得點解明明有咪錶卻偏偏要講價，咁樣對睇錶既司機好唔公司，亦即係鼓勵其他司機唔睇錶﹗將心比己，香港的士有咪錶，假如全部唔跟你又會點，只怪兩個原則怪，去旅行都要講原則﹗﹗ 再者，曼谷塞車是常識巴，搭機場線出到市區都只係半個鐘既事（機場線去到市區終站），與其係路上塞車，我都係比較搭鐵路﹗ 好彩既係，出左BTS站行去酒店，唔使五分鐘，仲全程係天橋接商場，朋友到埗後都相當滿意﹗﹗只係要車站向1號出號出，沿路都有指示，相當便捷﹗ 由BTS向酒店方向既景觀，完全唔使落路面，沿天橋行就係 沿路都有清楚指示 經商場行去酒店 係商場內既7-11旁既門直出就係酒店，夜返仲可以係7仔買野食 交通當算方便，咁環境又得唔得哩﹖﹖聽日再講 相關閱讀： 重溫曼谷 - 住宿篇 快閃曼谷 - 住宿篇
