面斥不雅 星期六，借機宣洩一下﹗子華神既面斥不雅，實在太寫實，道出近年社會種種令人慨憤既狀況，太多人忘記左面斥不雅，總覺得自己無問題就係無問題﹗﹗到底點解會咁，普遍教育水平高左，但自私心反而更高既哩﹖﹗ 好記得，小時候難得出九龍探親，一家搭長途巴士遠征，雖然家裡窮，媽媽仍會按人頭付費﹗之不過，假如有長者或有需要人士上車無位坐，阿媽一定會叫我地起身讓座，說：細路仔企下無所謂，要讓座比有需要既人﹗﹗但依家，莫講話你比左錢，我有試過朝早搭巴士返工，有人將袋放係鄰座座位上，當你表示想坐，佢話個位有人，係咪傻架你﹗係我見鬼定你有問題﹗原來佢係霸位比下個站上車既男朋友/女朋友（我兩樣都有遇過）。又，更什者就係每日都總會有人為"關愛座"而起爭拗，互相指罵﹗有人唔敢坐，有需要唔敢坐，萬一真係坐左又事必要要讓之類之類﹗ 唉，最慘係你企圖去同人講道理卻換來更多既指罵，於是敵對既情況越來越嚴重﹗﹗所謂既面斥不雅，就係明白每個人或多或少都有私心，但係當你企係公眾場合，就得替人著想一下，要顧及別人既感受，互相體諒吖嘛﹗﹗ 最近同朋友傾開，提佢某尐行徑或會令人覺得佢無禮貌，會令職場同事及上司尷尬，往後盡量留意一下﹗﹗佢答一句，我覺得無問題喎，我鍾意就得啦﹗﹗我明，的確有時上一輩係會太過拘謹，有啲野現今世代已經唔適用，之但係，依家講緊係會令人唔舒服既說話，令人唔舒服/反感既自私行為，唔係你鍾唔鍾意，而係人地鍾唔鍾意吖嘛，而你個答案都依然係係自身出發，咁就真係無野講﹗ 早前網路上有人帶住小孩出遊，為左唔想排隊過關而訛稱自己有身孕，有時你攞完著數都算，你仲擺上網同人分享你有幾叻，哩下唔比人鬧你先出奇啦﹗﹗你講完大話仲要覺得自己好叻﹖﹗ 尋日又啱啱睇到，有人出遊（又係日本）因遇上颱風而航班取消，為左慳錢而留宿機場，哩個現象其實都好普遍，無咩出奇，奇就奇在佢話為左小朋友訓得舒服，霸佔左人地既授乳室去訓，仲舖天蓋地咁上網話比人知佢幾咁醒目﹗真係無言，哩尐點可以唔面斥﹖﹗到底有無公德心，有無同理心，你自己都身為人母，你為左自己慳錢，為左自己既舒服而完全漠視別人既需要，到底係咩想法﹗﹗ 面斥不雅既意思就係大家識做，你唔太過份既時候大家都好來好去，無謂傷和氣﹗之但係，每日都見到咁多自私既行為，仲不知好歹咁覺得自己做得好啱好叻﹗﹗令人痛心既仲有另一單新聞，一個三個月大既BB女被發現伏屍家中，原因係咩﹖﹖係父母嗌完交各自離家出走，被獨留在家3日，到底係咩世界呀喂﹖有無責任心呀﹗你出到街，為左自己既利益而去自私，都仲可以理解，個個係你親生骨肉呀，自己十月懷胎生架，你為左自己一時之氣而可以完全漠視佢既需要呀﹗係咪真係自私成咁呀﹖
