攝於2016年1月 - Ananta Samakhom Throne Hall, Bangkok 話說突然心血來潮想出走，曼谷同台北係最唔使準備既地方，由本來既一個人出走變左做三個人，於是目的地由台北變左做曼谷﹗ 獨自出走同兩個人，同三個人出走係絕對有分別，自己出走，可以完全唔使諗目的地，唔使諗食野，就漫無目的咁四處游走，自己一個人行到邊睇到邊，唔使顧慮同行者會唔會太悶，會唔會太熱，會唔會太倦，更加唔使擔心肚唔肚餓，要唔要搵地方食野﹗自己一個，食野可以好簡單，什至唔食﹗ 當有同行者，就不能任意妄為，點都要顧及同行者既想法同感受﹗一齊去玩就梗係熱熱鬧鬧，開開心心，無理由好似當落街咁又係去個尐地方，又係食個尐野架嘛﹗於是，唔準備唔準備都係要準備，於是又開始上網爬文，睇下有咩新鮮好玩既地方﹗ 係搵既過程，發現左自己一個奇怪既習慣，原來自己唔係好鍾意係曼谷搭的士，問心，曼谷的士收費唔貴，只係唔鍾意的士司機講價，有人或者會覺得，即使佢地收貴你，都依然係平﹗係係係，收貴你都仲係平，之但係咁對尐老實既司機唔公平吖嘛，明明你個體制係有咪錶既，點解要開天剎價，落地還錢哩﹖咁不如全部唔好用咪錶啦﹗﹗去到秘魯，去到玻利維亞，的士確實係無錶，但的士司機都好自律咁會均一收費（可能只係我地好彩），點解你有咪錶我都仲要同你講價哩﹖係咩玩法先，我唔鍾意囉﹗﹗ 由有機場鐵路開始，我地去曼谷就更加抗拒塔的士﹗試過太多次，明明已經係排隊話係睇錶，但上車你都仲同我講價，咪玩啦﹗﹗唔係平貴既問題，係原則既問題，係公平既問題，咁樣對其他守法則既司機唔公平，亦姐係曲線鼓勵大家都唔睇錶。我認我固執，咁多年以來，我都係情願搭BTS或MRT去到最近既站然後行去目的地，如果太唔就腳既地方，會選擇唔去﹗﹗所以偏遠既地方都無咩點去過。 2016年攝於大城府 到早兩年去大城府反而仲好，搭巴士去景點，然後包車玩一天，咁我心甘情願。今次有朋友同行，唔想令朋友落空，但有啲想到之處要搭的士，維有多做功課，將目的地既地址寫得清楚啲，然後又試下搵預約的士，希望今次會對曼谷既路面交通有所改善吧﹗﹗
