無話可說 曾經，有一套韓劇係講及節目監製既工作，其中一集有講及，到底點樣可以將平平無奇既畫面加上標題去吸引觀眾，點樣利用剪接將拍攝片段既先後倒轉從而導引觀眾既想法﹖﹖標題，確實係好重要﹗網路上依家好多文章都會利用標題去譁眾取寵，出條好爆既題，然後拼貼一堆無關痛癢既內文，從而引讀者既好奇心，從而賺取廣告費﹗﹗可惡﹗﹗ 但另一方面，亦有一尐好有心機去分析，但有見標題平平無奇，於是無人問津﹗係面書轉發連結，到底有幾多個人會真心點擊開啟連結﹖假如轉發者有加點總結還好，都仲有會有留步望一下，但假如齋轉發個啲，恐怕十居其九都係會直接跳過﹗ 城市人太忙，想即時有答案，即時有新訊息﹗然後又急忙下結論﹗早前不鏽鋼飲管事件就已鬧得熱哄哄，真心無言，明明係物主自己三年無洗飲管，然後就接連既網媒話不鏽鋼飲管唔安全。有人無公德心亂掉不鏽鋼飲管落海，然後又有人走出泥問誰說不鏽鋼飲管對海洋生物友善﹗救命，亂掉垃圾，無論你掉咩落海都係人既問題，唔係產品問題耶﹗﹗ 所謂有圖有真相，於是，大家唔知點解慢慢變左齋睇圖﹗試過有朋友自己係自己面書轉發左一條有關食店既片，然後有人留意話想去食，樓主居然答：唔知係邊﹗﹗靠，相關連結明明係清清楚楚寫明食店名稱同地址﹗﹗ 又，有無見過有網上商店係面書推介貨品，係相片描述內容清楚講明貨品既價錢，規格，如何訂購，訂貨需時多久之類，但係依然會九千人留言問幾錢，點訂，幾時有貨之類之類﹗﹗如果我係樓主都幾慘﹗明明咁好心機打左一篇野，但最後還是要逐一回覆﹗ 身邊越來越多哩尐咁既標題黨朋友，尋日有人係面書發帖，話有小女孩走失，要求廣發以助尋人﹗發文無耐已經更新話搵到﹗但一堆唔睇內文既好心文就無限轉發，真係唔知應該講咩，證明身邊都係一班太善良但不負責任的好心人，一班只睇標題而唔睇內文既好心人﹗﹗到底大家係咪真係咁忙，忙得不加思索，人云亦云﹗
