上一篇：迷失。荷。比。盧（十二） 離開馬斯垂克 - 荷蘭最南邊城市既一天，依然係雨粉飛飛，根據天氣預測，盧森堡既天氣都差唔多，所以決定11點先出發﹗ 再見馬斯垂克 在微雨中離開馬斯垂克 由馬斯垂克去盧森堡，其實係要跨越比利時國界，先由馬斯垂克搭火車去到最近既比利時城市LIEGE（車票安排），然後再利用比利時RAIL PASS過盧森堡﹗根據資料顯示，路程中應該只需要係LIEGE轉一次車，之但係，都唔知點解，好似一踏入比利時國界就點都要迷失一下咁，之前一晚搵火車班次時又發現，路線有改動，點呀喂﹗﹗想點先﹗ 係比利時國鐵網站搵火車班次時發現，有部份班次有感歎號（姐係有改動） 由馬斯垂克過盧森堡，火車車程要3個半鐘，中途轉一次車，本來都諗住可以舒舒服服咁訓下，點知係搵班次過程，又發現有伏，有部份班次有感歎號喎，CLICK入去睇就會發現係部份路段損毀，中途要再轉巴士﹗但係，點解又有尐有，有尐無既哩﹖點呀喂﹖﹗於是個朝親身去到火車站問，火車職員話，佢睇機無問題喎﹗無顯示要轉巴士，唉，算，反正係唔係都要轉，OKOK，上左車先算﹗﹗ 馬斯垂克到LIEGE路段既跨境車票 比利時段既RAIL PASS，加之前係網上買好既比利時跨境到盧森堡既車票 上車前要準備既，係一張馬斯垂克到LIEGE既跨境車票，比利時境內既RAIL PASS，加一張比利時跨境到盧森堡既車票，網上有人教，萬一有人查票全部比哂人，其實係唔需要既，換轉係你，你係荷蘭國鐵既職員，我比埋其餘個尐你做咩姐，都唔係你既管轄範圍，咪搞啦﹗查票的話，你係荷蘭境咪比荷蘭個套票囉，比利時境咪比RAIL PASS，盧森堡段咪比盧森堡個張囉﹗﹗咪傻﹗﹗ 好，第一個迷失，車站資料明明話去到LIEGE係要換月台轉火車既，真係撞鬼佢，好彩落車有望清楚，我地個程係係返同一個月台既，要不走來走去，錯過班次就真係唔慌唔迷失，所以，再一次，除左之前搵左資料之外，到時都仲係要執生，望多兩眼迷亂上車﹗﹗﹗ 資料顯示中途要轉巴士，又，係LIEGE要轉月台 又話要轉月台，但根本就係返同一個月台上車 盧森堡的火車 真係去到半路就要轉巴士 去到半路要轉巴士 好彩指示都清楚 好彩指示都清晰 到達盧森堡中央車站就落大雨 中途要再轉巴士，好彩既係車站指示都清楚，職員亦幫忙指導乘客上車，都有足夠時間，唔會話漏底一兩個轉唔到巴士﹗不過一入到盧森堡範圍就開始落大雨，好彩落左陣就雨勢減弱，由車站行去酒店都未至於太狼狽。
