好多事,電影拍續集,都未必會比第一集好睇﹗拍完第一集,拍得第二集,姐係意味第一集好受歡迎﹗咁,睇完第一集,入得場睇第二集既觀眾,當然亦會抱住更大既期望﹗或者係咁,因為已經抱有特定既期望,於是,好多時都未必有好下場﹗﹗ 食店都一樣係咁既情況﹗顧客幫襯得第二次,姐係食過覺得味道唔錯,收費接受,然後環境OK先會再次光臨﹗第二次真係好重要,假如電影,你睇完續集都依然鍾意,咁你就應該會變成擁護者,咁電影公司再出第三、第四,外傳,前傳,翻外篇,你都一定會再睇﹗﹗同樣,假如一間餐廳,你去食第二次,你都依然覺得滿意的話,咁如無意外,你以後都應該會繼續幫襯﹗﹗ 嘻,或者只係對我地哩啲上左年紀既人先適用,依家好多人都追求新鮮,食材當然要新鮮,但我講既係煮飯要新鮮,餐廳裝修要新鮮,食法都一樣要新鮮,要不,食客點影相呃LIKE﹗太多新鮮既要求,所以熱潮過後,好多跟風既餐廳就未必做得住﹗到底點樣去留客,點樣去維繫食店同食客既感情,比起情人之間更難(哈哈,沒半點誇張啊﹗﹗) 查實本來我係想講上星期日,同朋友仔去左間STEAK HOUSE度食既食後感架﹗但打打下,又想講返尋晚去食牛舌既小小經歷喎,講邊樣先好哩﹗都係講返STEAK HOUSE先﹗﹗ 話說之前有同過朋友去銅鑼灣一間餐廳度剧扒,我明明說得銅鑼灣店去左兩次架,但搵來搵去都只係搵到其中一次既相﹗餐廳唔算大,地點係駱克道近鵝頸橋位置既單幢式商業大廈,全幢大廈都係食店,我地都係因為有次去樓上既意粉店,其他食客光顧,電梯停靠時開門見到,聞到好香炭火味,於是就決定幫襯﹗ 銅鑼灣店樓底比較矮,所以比較嘈,氣氛就相對會覺得熱鬧,同埋,食完會一身炭燒香味﹗﹗光顧左兩次,第一次係三個人,後尾我地兩個人再去多左次,但搵極都搵唔到第一次既相,我懷疑個日我無帶手機﹗ 沙律係相當唔錯既,好醒胃好新鮮 好明顯係餐湯 即象中個扒同蝦都好食,牛扒有炭燒香 唔知有無記錯,哩個好似係牛頰肉,好稔好滑 飯後甜品 跟餐甜品 兩次到訪銅鑼灣店都係今年年初既事,假如唔係好食,我地兩條友唔會再翻轉頭幫襯既﹗套餐都幾啱食,價錢都抵食,一至四有折扣,又可以ONLINE訂檯,啱哂我哩啲唔鍾意打電話訂檯既人。 咁,話說上星期有朋友仔約食飯,本來都係諗住約銅鑼灣店架,但星期日唔想過海,於是就約左去同一間餐廳既尖沙咀店﹗第一次去,都有少少搞笑野,餐廳係一間服務式住宅既二樓,係入口處搞左好耐,到底係點入,怕誤闖人地住宅就唔好啦﹗最後原來都係推門入搭電梯, 尖沙咀店地方比較大,樓底比較高,比較安靜,銅鑼灣店會係朋友聚會既熱鬧氣氛,而尖沙咀店似乎就比較適合舒舒服服,安靜既傾下計﹗唔知係咪星期日哩,餐廳所在地唔係旺街,所以都唔算量,只係得幾檯客,偶爾見到樓上既住客落泥食野,但食完好快就走﹗﹗ 好,講返食野先,查實點解想再幫襯哩間餐廳,係因為上次到訪時見到人地食斧頭扒﹗哈哈,有幾檯客都有叫,燒得好鬼香又好鬼靚,但我地得兩條友,而件扒有1.5KG,雖然去意大利旅行時,都有試過兩個人食哂1KG既Florentia Steak,但1.5的話,怕食唔哂,無謂哂﹗ 意大利既bistecca alla fiorentina(費倫天拿烤牛排),一般都係1KG 咁今次係三個人,而且同行朋友都出名大食(哈哈),咁就梗係要試下﹗假如單點的話,一份斧頭扒要HKD1188,但假如叫餐哩,就HKD1488,有沙律,有青口,仲有意粉同雜菜,價錢都OK吸引呀,梗係要試下啦﹗﹗ 尖沙咀店環境比較幽靜舒服 假如叫餐會抵啲 雜菜沙律,依然取材新鮮 青口雖然細粒左少少,但都好鮮甜嫰滑 意粉香口彈牙 雜菜同醬計都好味 最期待既斧頭扒 五成熟,但似乎肉質普通 其實整體都OK架,但可能太期待,或者係我地要求高,所以有少少失望﹗個餐既其他食物全部都OK過關,斧頭扒我地點左五成熟,火喉亦控制得好好,不過,好明顯本身件扒肉質麻麻,所以食落口唔夠香,唔夠肉味,肉質亦有點"鞋"口,或者只係咁啱哩件唔夠好哩﹗﹗都會再去試既,因為其他野食都OK,點都應該再比次機會既﹗﹗