最近多左人講環保，多左朋友樂意去買一大堆環保產品，企圖去表現自己有環保認知，有心想做環保係好事，但係咪真係個個都明白環保係咩哩﹗﹖又，唔知係咪想環保既人係咪比較單純哩，總會遇到有趣既問題﹗ 例如，好多人見你用不鏽鋼飲管，都會問，難唔難洗架﹖﹖有朋友什至會問，洗飲管有咩方法﹖﹗ 好多人會問，不鏽鋼飲管難唔難洗，真心唔識答 靠，真心唔識答，到底係咪環保到哩個程度，連用腦都唔想﹖﹗一般情況下，你枝飲管會飲咩吖，都係液體既姐，會有幾難洗哩請問﹖當然，你夾硬塞啲硬物入去就無野好講啦﹗﹗你洗野都係沖下佢，浸下佢，咩都洗乾淨啦﹗再者，哩個世界係有樣野叫有飲管刷架嘛﹗﹗ 世界一早發明左刷哩樣野，你洗樽洗壼都有刷，洗飲管都有既姐 亦有聽過有人問，餐廳用環保飲管，乾唔乾淨架，阿先生小姐，你平時用緊個啲膠飲管，又乾唔乾淨哩請問﹖用之前無洗過架喎，係工廠生產完直接送過泥架喎，你能確保生產過程係乾淨嗎﹖咁點解你敢用哩又﹖再者，餐廳放置飲管個架，乾唔乾淨﹖存放期間，會唔會有曱甴老鼠小昆蟲爬過，你又知唔知﹖假如你要懷疑乾唔乾淨，應該係懷疑你幫襯既食店，咁佢所有用具都可以有機會唔乾淨，而唔關個枝係唔係環保飲管事吧﹗﹗ 又，有人話環保好吖，自備飲管都好吖，但個啲飲管好貴喎﹗呀，深水埗/淘寶賣緊2/3蚊枝咋，又平又環保，正吖﹗你地都傻既，做咩要買枝咁貴既姐﹗ 拜託，不能否認，生產不鏽鋼既過程其實一啲都唔環保，但一枝合資格既不鏽鋼飲管，係可以用一世的，總算是彌補返﹗你買枝唔合格既，轉個頭就生鏽，轉個頭又要再買，飲用過程仲會對你自己既身體健康做成傷害，實在不願置評﹗﹗ 講起轉頭又要再買，身邊仲有一種大頭蝦朋友，佢一買就買五個隨身帶既水樽，細問原因，就係因為佢經常唔見野﹗﹗咁樣的話，請先改好失魂既陋習，要不你買幾多環保產品都一樣枉然﹗﹗
