係天水圍住左廿年，甚少係區內活動，假期頂盡係陪屋企人去飲下茶，茶樓來來去去都係個間，唔覺有咩新意，質素亦只覺平平﹗﹗ 講真天水圍咁大，餐廳食店當然唔少，只係，無咩機會去發掘，無咩機會去細嚐。只知新北江有間唔錯既車仔面檔，天一商場有間幾好食既麵線（但最近都覺得水準不再），天頌有間幾好食既菠蘿包，呀，仲有，鄉村俱樂部既炸雞脾都唔錯﹗只係，全部都唔係咩美食，假如約朋友食飯，要係天水圍搵食店，似乎暫時都未有推介﹗ 不過哩個想法，啱啱被打破了﹗﹗星期四晚，兩個人無無聊聊咁走左去天澤商場，時間接近晚上9點，係商場度行左一圈，都未能鎖定目標，商場本來就唔旺，入夜就更加人流稀少，為左唔想餓住返屋企，於是隨意入左間日式餐廳﹗﹗隨意點左個湯烏冬、刺身飯，然後點左啲串燒﹗之不過，落完單職員好快已經回頭話，薄燒牛舌無哂，燒銀杏沽清﹗﹗ 噢，都係既，晚上9點，賣哂都好正常，店員好有信心咁話，薄燒牛舌賣哂，不如試下個厚燒牛舌心吖﹗﹗無妨，反正我地本身就鍾意食牛舌，只係一般厚燒都會靭，既然你咁有信心，又試一次吧﹗ 時近9點既日式餐廳，人流比較少 牛舌烏冬過關，湯頭好甜，烏冬質地亦算不錯，不過我自己鍾意再煮透啲既 刺身飯正常，好過天耀報稱好出名個間 厚燒牛舌心不得了，有炭燒香味，牛舌也爽口彈牙，有點在東京吃到的那一種 牛舌湯烏冬同刺身飯都順利過關，薄牛舌好嫰滑，湯頭夠鮮，刺身材料亦算中上，其實仲點左個燒雞翼同枝豆，亦處理得好好。至於個牛舌心，果然唔錯喎，真係有炭燒香味，肉質爽口彈牙。厚切牛舌比較難處理，好容易會靭，所以唔多地方會賣﹗ 如果要食牛舌，最回味既應該日本既利久，未有機會親身去仙台食，不過每次出走東京，都總會忍唔住要去新宿店幫襯﹗哩個係天澤商場入面既牛舌心，當然比唔上利久，但真心唔差喎﹗食完又忍唔住再點多左份，無諗到係哩個咁偏僻既商場會搵到間咁有水準既日本餐應﹗﹗ 星期五晚同左朋友去銅鑼灣一間薄有名氣既日本餐廳，都點左牛舌心，餐廳落左好多黑椒去處理，當然惹味，但假如要比，都係覺得天澤個間好食啲喎﹗唔需要好重既調味，本身個處理手法已經夠好﹗哈，最重要係，銅鑼灣個間都係靭，唔似天澤做得咁爽口彈牙﹗﹗ 真係痴左線，星期四晚先食完，今晚兩條友無無聊聊又再走去食多次，但情況就同早兩晚唔同﹗大概係周末既關係，未到七點就已經滿座，要等位﹗其實餐廳座位都唔少架，都可以坐滿，咁姐係証明原來都受歡迎，好彩等左陣就有位﹗ 周六晚既七點幾，全院滿座 叫左個牛肉鍋，份量都好足 煮好既牛肉鍋，好鮮甜，失肉亦好嫩滑 今晚叫左個壽司拼盤，正 鹽燒雞翼，燒得皮脆肉嫩 終於食到燒銀杏 牛舌心，水準依然 燒秋葵都唔錯 估唔到哩度會有靚拖羅食，不過我地無叫 無意中發現，食店既外賣盒係用紙的耶，雖然唔係全部，但都相當有心 外賣湯都係用紙杯，老闆話一來品道較佳，二來唔想製造咁多塑膠垃圾 今次客人多，所以唔似星期四晚咁點完即刻有得食，等食期間，無無聊聊四圍望，哈，原來哩度有靚拖羅賣，大拖羅刺身（3件）都要285，佢地一般食物都收得相宜，拖羅刺身收得哩個價，應該都真係靚野，搵日再試﹗﹗另外一個有趣既發現係佢地部份既外賣盒係用紙既，偷影期間有店員發現，細問之下，店員話老闆唔想用咁多膠，雖然外賣盒根本就唔環保，但取捨之下，只希望能夠減少一點塑膠產品﹗希望日後會做得更加好﹗ 食物水準真係唔錯，好過同區其他報稱出名既日本食店。即使星期五晚食過個間銅鑼灣人氣居酒屋，比我揀我都會返天水圍搵佢地﹗﹗ 下次約朋友，哈，可以叫佢地入天水圍了﹗﹗
