想轉食素，數數手指，原來都超過4年，可惜至今一直都轉唔到﹗或者係藉口，自己一直都鍾意食海鮮、鍾意刺身壽司，的確耐唔使會掛住﹗或者係理由，家人一直對食素反對，亦無認知，所以一直舉步為艱﹗﹗ 同檯食飯，真係可以各自修行﹖﹖雖然自己唔鍾意食野，但身邊人就偏偏相反，對食物好有要求，一齊去旅行，得兩個人食野，假如要求對方陪同食素，等同剝奪左佢去旅行享受美食既權利，於是，一直唔敢堅持﹗﹗又例如，自己停左食魚翅有超過10年，但家人就覺得係美食，過時過節都會係屋企自己煲，戒左10年，家人時至今日都依然會問道：你唔食呀﹖做咩唔食呀﹖好好食架喎﹗有時真係只能報以苦笑﹗唔好企圖去改變別人，亦唔好企圖去同家人說教，你會得到既答案係，鯊魚咁醜樣，又無貢獻，佢地係海裡面只係飾演捕食者既角色，點解要保護佢地﹗﹗你想食素，無論你話佢地知係身體理由，定係環保理由，佢地都依然會得你搵野泥做，唔食肉咪仲唔健康，唔夠營養﹖連教左幾十年書既人，都會問你，你食素，唔夠飽架喎﹗﹗跟住就係，豬、牛、羊，鷄本身就係為左提供肉類先至養佢地，假如唔食，哩啲動物仲有咩功用﹗﹗ OKOKOK，我知，我當然想反駁，只係，家人就係家人，你點樣反駁，講幾多理由都依然係徒然既﹗﹗或者哩個就我覺得活著很無聊既原因，因為。。。所有野我都唔想去爭取，唔想去據理力爭，唔想去改變別人，因而改變自己﹗反正再努力都係枉然﹗﹗ 想食素，好似好自然就會想保護大自然，進而愛護地球，於是，又會想對環保做多少少野﹗一直都有帶水樽出街既習慣，保溫壼，冬天裝熱飲，夏天放冰裝凍飲，帶手巾仔，帶毛巾出出街早已經成為習慣，舊年開始接觸不鏽鋼吸管，於是亦想多行一步﹗但原來，素苦，走塑亦苦﹗﹗依然，除非你一個人出街，要不，要走塑同食素都一樣係咁難。 別人眼裡，你想走杯走飲管，假如你選啱時間，又選啱店舖的話，走塑基本唔難，難既係你既隊友會比咩反應你﹗﹗我有三枝不鏽鋼飲管，或者無咩人信，其中一枝不鏽鋼飲管連匙已經用左廿年，係，係廿年，當年都仲未有人講環保，我用百幾蚊買左哩枝18/10，當年連規格都唔識，只係見到個設計啱用，可以係屋企飲凍飲而唔使再用膠飲管就買左﹗﹗但每次係食店拎出泥，都會遭人白眼，遭人嫌棄，嫌既唔係店員，而係身邊個個﹗佢會覺得你為店員添麻煩，會覺得一枝飲管姐，無必要要搞咁多野﹗﹗ 我的不鏽鋼飲管 又，明明個背囊有帶環保盒，食物袋，每次想拎出泥買外賣既時候，你都會聽到被嫌棄既聲，然後話：唔使呀吖﹗﹗還好，屋企做唔使回收分類唔係佢管轄範圍，唔會得到太大既阻力，但凡你出街想扮環保人，你都要有心理準備受到試鍊，唔係店員，而係你身邊那一位﹗﹗ 一般女仕個袋會有一大堆既化妝品，而我個袋就係一大堆既環保用品 我的走塑日常 食物布最輕，但用起上泥無咁方便 你帶食物袋去買野，身邊總會有人問你，人地都係紙袋之嘛，唔使啦 難得係老麥走塑買雪糕，但隊友既反應就係，你去買啦﹗ 阿姆斯特丹橋底遇見的情況，教人心酸 其實大家都知要環保，只係，你會得到既答案係，個個都開冷氣，唔開咪熱死。1枝飲管姐/1個紙杯姐/1個膠樽姐，無影響既﹗﹗係呀，咪就係個個都係咁，大家都將責任進去別人度，咁就個個都使做啦﹗﹗回收﹖政府個尐收左咪又係去堆填，點解仲要分類﹖﹗ 早前有朋友笑指，我既興趣就係環保﹗﹗才怪，環保唔係一種興趣，而係作為一個人既基本條件同責任，同個人操守同有無公德人問題，都係作為人既基本責任﹗對於走塑，能走多遠就多遠吧﹗
