HOME ALONE既第7日，本打算趁假期又好天氣，外出走走，享受一下難得的自在，誰不知頭痛發作，頭漲痛的日子確實令人沮喪。 唔想出街，實情係無能力出街，無無聊聊在家，又整理下個堆擠迫戶既明信片，屋企個兩塊白板，早已貼得密密麻麻，有點份仲因為重疊，厚得連磁石貼也無法貼穩，但實在唔想再買多塊，一直都未諗到點安置佢地﹗﹗ 即使唔計朋友仔去旅行寄比我地個尐，自己習慣去每個地方都起碼寄一張返屋企，有掙扎過唔再寄，但係唔鍾意買紀念品既人，假如連明信片都唔買，旅程又好似無咩回憶咁﹗﹗講起明信片，繼之前紐西蘭因為有兩間唔同郵政而寄失明信片後，今次荷比盧之旅寄明信片時又有新體驗﹗﹗ 首先，咪以為買明信片話都無咁易，我地係盧森堡就買唔到，或者係到訪兩天都落雨掛，沿途所見唔係好覺紀念品店，於是係買唔到明信片既﹗﹗ 咁係荷蘭同比利時哩，明信片就通街都係，不過就有尐特別﹗﹗第一批明信片係係荷蘭鹿特丹，行緊MARKTHAL個陣買既，當時諗住順便買埋郵票，店員表示€2.2一個，其實覺得有尐貴，但諗住荷蘭既生活指數係比較貴，所以無為意就直接比左錢﹗﹗﹗ 第一批明信片係鹿特丹MARKTHAL買 臨離開阿姆斯特丹當天先四圍搵郵票，好彩火車站入面有 見到有哩個標示姐係會有郵票賣 後來係小孩堤防再買明信片既時候，商舖表示佢地無郵票賣，沿途去其他地方亦陸續有買，但買買下唔記得左自己買左幾多，於是就索性返到阿姆斯特丹先再搵郵票，點知咁就出事啦﹗﹗係舊城區既幾間紀念品店打聽過，都話唔可以單獨買郵票，要買就要跟明信片買﹗咁點算哩﹖﹖後來打聽左一輪，終於打聽到火車站入面會有買郵票既地方，不過唔知點解無人叫我去郵局喎﹗ 去到火車站搵左一輪，終於都搵到個間有郵政服務既商舖，當向店員表示想買郵票既時候，發現原來唔可以逐張買，而係好似係香港咁，一買就要買十張﹗哩個無問題，我剛好要十張，之但係，佢既收費係€1.4一張，吓，€1.4﹖﹖我之前係鹿特丹買係€2.2喎﹗﹗即時對返之前係鹿特丹買個幾張，一模一樣架喎，當時先認真睇，郵票上面明明係標明€1，但點解收費有差異﹖﹖問店員，點解有差異，佢只係答，我地係賣哩個價，姐係點哩﹖﹖有無人可以話我知呀﹗﹗ 郵票上面明明標明1歐 DINANT係SAXOPHONE之父既故鄉 一樣既郵票，居然收費唔同 自從係阿姆斯特丹遇到"郵票一定要配明信片一套買"既經驗，去到比利時都盡量一齊買。我分別係DINANT小鎮同布魯塞爾買過郵票，但細果都係遇到價錢不一既情況﹗﹗係DINANT買既係€1.6一張，而係布魯塞爾買既哩﹖就要€2.0一張﹗﹗媽呀，我好亂呀，明明係一樣既郵票，明明郵票上明標明郵費係€1，點解我比既錢會多過郵費﹖﹖ 我假設唔係商舖買要收手續費，但都未至於咁多掛，仲要係海鮮價，間間唔同﹗﹗寄左咁耐明信片都真係第一次遇見下次去旅行之前，都係上網查埋當地郵費，同埋。。。都係直接去郵局買會安樂啲﹗﹗ 相關閱讀： 明信片事件簿 明信片事件簿 - 意大利篇 明信片的命運
