唔記得有好幾耐無食過太平館。太平館，一間百幾年歷史既餐廳，當然有佢既生存之道，佢既食物唔係唔好味，但唔知點解，朋友間就係好少會提起話想去食野﹗話說早兩晚，幾個識左廿幾年既朋友突然話約食飯，本來想去食放題，但其中一個朋友會帶埋小女兒出席，放題會唔抵，左諗右諗，又想近工作地點，方便可以折返做野，諗起太平館就係隔離街，於是就決定訂檯﹗ 下晝打去訂檯個陣，對方話只可訂7點，過後就只能WALKIN，其實，工作天既晚飯，斷估唔會好多人既，但既然難得約到哩幾個朋友，訂左無壞，好過到落雨濕濕企係門口等位﹗香港人，有幾多個可以準時放工，於是陸續都收到短訊話各人都要遲到，見大家都未到，自己又做下野先﹗於是，搞到7.20先到餐廳，我仲估入到去尐叔叔會有說話過你聽﹗哈，居然又無喎，接待個位部長好客氣咁話，塞車呀哩，唔緊要，入去坐吖﹗嘩，難得既親切呀﹗﹗ 我開始有尐印象，我懷疑近年少左去食野，係因為服務態度問題，係咪哩﹖查實唔敢肯定﹗﹗太平館有返咁上下歷史，佢既職員都自然有返咁上下經驗，個個都係年長既叔叔，唔知係咪之前去過，叔叔們比較無咁友善，所以就情願唔去哩﹗真係唔記得﹗﹗不過以前係點唔重要，重要係依家既服務態度好好就得啦﹗﹗ 一踏入餐廳，裝修同餐牌都無變過，去得太平館，大家都係點個幾樣野架啦，今次最深刻既，唔止係食物既味道，仲多左份濃濃既人情味﹗﹗我估應該未來會幫襯多尐﹗﹗ 因為同場有小朋友，但人又未齊，於是就建議不如叫個野飲先，其中一位叔叔已經話，不如飲雪糕紅豆冰或者涼粉紅豆冰啦﹗﹗小朋友都係心多，幾個大人為免佢選擇突然改變主意，於是每樣叫左杯，加個芒果沙冰，咁就萬無一失﹗其實小朋友，但凡係甜野都啱架啦，飲品泥到，就梗係樣樣都話好味﹗﹗過程中，我表示想走飲管，叔叔都依然面露笑容，唔單止無問題，仲傾左一輪環保既話題﹗﹗確實係難得﹗ 無諗過太平館都肯走飲管 乾炒牛河 牛脷 瑞士雞翼 乳鴿 唔夠食，於是再加多個瑞士汁牛河 用切蛋糕既手法，二話不說就分好一人一份 等左一輪朋友先到齊，點完野食，叔叔又好醒目咁聽到席間有朋友生日，主動問要唔要幫手影相，哈哈，真係好體貼﹗﹗其實個晚都FULL HOUSE架，但叔叔們都依然好細心咁照顧周到，實在難得﹗食物唔刻意介紹啦，真係個個都係叫個幾樣，最後梗係唔少得個個巨型梳芙厘，一送到上檯，叔叔又再主動問多次，要唔要幫你點蠟燭影個相，真係無得頂呀﹗影完相仲用佢既專業手對幫手分左個梳芙厘，小朋友又食得開心，大人又滿意服務周到﹗﹗
