紅圈係AMS中央車站正門方向,左手邊個箭咀係頭兩晚既住宿,右手邊遠啲個個箭咀就係後尾既旅館位置 兩間既風格完全唔同,第一間係精品酒店,房間入面除左得兩張床就咩都無,房間好細,細到唔可以打開個篋,但千萬唔好以為佢會平,因為佢係正火車站隔離,即使係咩都無都依然係貴﹗兩晚合共€353(含早餐),另加CITY TAX€17 。 再提一次,歐洲大部份既旅館/酒店,除左房價之外,仲要另外加收CITY TAX,即使你事先已經做哂ONLINE PAYMENT,除非你個費用已寫明包含CITY TAX,要不一般都會在客人辦理入住手續時收取﹗而CITY TAX好似係以旅館既規格級數而收取。 阿姆斯特丹中央車站既正面 作為荷蘭既首都既中央車站,阿姆斯特丹既中央車站係一座好古舊既建築物,已經有百幾年歷史,旅客往來頻繁,忙碌非常。估計頭一日會好夜先到阿姆斯特丹,想搵間近火車站既旅館,最近既就真係正正係火車站隔離,由正門方向出轉右行唔使五分鐘就到﹗﹗ 由火車站正門出口轉右就會見到酒店 房間比較細 點擊圖片放大 由酒店房間既窗可望到火車站 餐廳都夠大 早餐唔算好多選擇,但職員會不停補充食物 酒店餐廳可以望到火車月台 選擇唔需要多,新鮮同夠食就好了 客人食完要幫忙收拾餐盆 其實酒店都真係相當體貼,佢明白旅客住近火車站都係為左方便移動,但旅客往往都係行式匆匆,可能要一早起身趕火車,又或者之前一晚好夜先到,朝早想多睡一會,唔想限時限刻迫客人趕早餐,所以用餐時間係清晨4點至中午12點﹗極之貼心既安排,又或者有時想慳錢,將早餐同午餐夾埋一齊食亦可﹗﹗ 食物選擇唔算多,但份量都好充裕,亦好新鮮,都係重質唔重量(意思係種類)既表現啦﹗﹗仲有個有趣既地方,就係餐廳原來係正中央車站既月台隔離,邊食可以邊睇到火車站既情況,哈哈,我有少少妄想,假如酒店可以直通火車站月台,咁就GOOD FIT啦﹗(當然唔得啦﹗)食完早餐,客人需要自己將食物盆放回餐車,我自己好習慣哩個做法,當你要自己收拾,就自然地會珍惜食物﹗或者酒店本意係為左慳錢,無紙張交易,酒房內唔提供一次性既即棄產品,餐廳要自行收拾從而減少浪費,站係環保角度去理解亦說得通。 以我長氣既性格,果然一篇係寫唔哂既,唯有再開多篇寫埋另一間。