真正既脆皮燒鵝 4月15號晚同朋友去左大埔一樂食飯，聽到個唔係太好既消息﹗雖然唔算係熟客，但都叫做係常客，起碼一個月幫襯一次，實在感到可惜﹗﹗ 提起一樂燒鵝，我估大部份人都會諗起中環個間舖，但實在，佢地本舖係係大埔既大明里架﹗ 已經唔記得係幾時開始鍾意係一樂食燒鵝，家住天水圍既我，好少會走入大埔，但偶爾有一次路過（可能係行完山之後），見到大明里有間一樂，中環間一樂曾經入過米之蓮名單，所以有啲印象，當時仲懷疑，到底係咪同一間舖﹗ 只見下午茶餐，45蚊一個燒鵝瀨，連飲品，咁抵食﹖抱住一試無妨既心態，又即管幫襯一次﹗一行入舖，一般既茶餐廳格局，最特別既，係牆邊放滿魚缸，養左好多龍吐珠﹗ 兩個人一人叫左碗燒鵝瀨，話，真係唔講得笑，真係皮脆肉嫰，好食過深井既任何一間，最緊要係個鵝仲係熱架，肉質嫰滑。平時食燒鵝，沾個個酸梅醬汁，多多少少係為左減輕燒鵝個個油膩感，但哩度既肉好滑，完全唔油，即使唔沾個個醬汁都無問題，當然，沾左就更好食，皆因佢個汁好食過出面個啲﹗﹗後尾過泥食晚飯，個醬汁送飯都經已無得輸﹗﹗ 仲好記得第一次食既情況，對面坐左兩父女，應該係熟客，見到我地兩個對住碗燒鵝瀨經已咁開心，就語重深詳咁教我地，識得食，梗係食燒鵝髀飯/瀨，全髀，都只係80蚊。當日，我地係真係即時買左兩隻燒鵝髀返屋企孝敬家中長老既﹗﹗ 點擊圖片放大 大埔一樂 經營了半個世紀的老店 自此，我地兩個就間中過大埔食晚飯，一般都會係一個燒鵝脾飯再加個菜﹗偶爾有朋友同行，就直接叫半隻鵝﹗呀，佢地個薑葱炒蟹，承惠一百蚊咋，都相當抵食﹗﹗ 我地最愛既啫啫芥蘭煲 1百蚊既薑葱蟹 話說尋晚約左朋友食飯，三個傻人又由元朗走去大埔，一踏入門口覺得有點不自然，到底係咩哩﹗﹖呀，魚缸既魚呀~~~~八掛問下相熟既阿姐，點解魚缸無哂魚既﹖﹖阿姐即時面色一沈，細細聲咁答，送哂比人啦﹗老闆話做埋哩個星期唔做﹗﹗ 唔係呀嘛﹗﹗﹗ 跟住再搵另外一個平時有偈傾既阿姐再問，係咪真架，真係唔做﹖﹖阿姐既反應係，你點知架﹗﹗然後又即時收細聲線，係呀，唔做啦﹗﹗點解呀~~~~你問老闆啦﹗於是成餐飯既氣氛唔同哂﹗唉，點解架，一間經營左半個世紀既食店，廚房師傅的確有一兩個年紀比較年長，但老闆該未到退休年齡架，太可惜了吧﹗﹗ 於是埋單個陣厚住面皮，扮無知咁問，老闆，點解唔見哂啲魚既﹗﹗老闆最初都只係話，係呀，裝修呀﹗﹗後來再傾幾句，佢先話，未知呀，睇下點啦﹗希望可以開得返﹗總之暫時就決定只經營到4月22。唉，始終唔熟，唔敢追問，照計做左幾十年，舖頭應該係自己舖掛﹗無理由係加租問題，內情真係唔知，只希望問題能解決，去完荷蘭返泥可以再食到啦﹗﹗ 有點後悔既係，原來一直都無點係度影過相，皆因第一次入泥諗住踩場，跟住發現太好食就更加唔會記得影﹗﹗之後熟絡左又唔覺得要影﹗﹗假如佢再開，一定要影﹗ 平時滿滿既魚缸，尋晚變得魚去水空 餐廳裡仲有幾隻可愛既小貓咪
